കണ്ണൂർ: പയ്യന്നൂരിൽ യുഡിഎഫ് സ്വതന്ത്ര സ്ഥാനാർത്ഥി വി കുഞ്ഞികൃഷ്‌ണൻ അനുകൂലിയുടെ വീടിനും വാഹനത്തിനും നേരെ ആക്രമണം. ചെമ്മീൻ കർഷകനായ ടി. പുരുഷോത്തമന്റെ വീടും കാറുമാണ് ആക്രമിക്കപ്പെട്ടത്. വോട്ടെടുപ്പ് അവസാനിപ്പിച്ചതിന് പിന്നാലെ രാത്രി 11 മണിക്ക് ശേഷമാണ് സംഭവമുണ്ടായത്.

വീടിന് മുന്നിലുണ്ടായിരുന്ന കാറിന് തീയിട്ട അക്രമിസംഘം വീടിന്റെ ജനലുകളുൾപ്പെടെ തകർത്തു. സംഭവത്തിന് പിന്നിൽ സിപിഎം പ്രവർത്തകരാണെന്നാണ് ടി പുരുഷോത്തമൻ പറയുന്നത്. വീടിന് മുന്നിൽ നിർത്തിയിട്ടിരുന്ന കാറിൽ തീ ആളിപ്പടരുന്നതുകണ്ടാണ് പുരുഷത്തോമനും കുടുംബാംഗങ്ങളും പുറത്തേക്കിറങ്ങിയത്. ആക്രമണം നടത്തിയശേഷം ഓടിപ്പോയത് സിപിഎം പ്രവർത്തകരാണെന്ന് അദ്ദേഹം പറയുന്നത്.

ഏറെ നാളായി സിപിഎമ്മുമായി വിയോജിച്ച് നിൽക്കുന്നയാളാണ് പുരുഷോത്തമൻ. തെരഞ്ഞെടുപ്പ് പ്രചരണത്തിൽ കുഞ്ഞികൃഷ്ണനൊപ്പം സജീവമായിരുന്നു.