കോഴിക്കോട്: പറമ്പിൽ നിന്നുള്ള കൂണ്‍ പാചകം ചെയ്ത് കഴിച്ച ആറു പേരെ ഭക്ഷ്യവിഷബാധയെ തുടർന്ന് ആശുപത്രിയില്‍ പ്രവേശിപ്പിച്ചു. ചികിത്സയിൽ കഴിയുന്നവരിൽ 12-ഉം 17-ഉം വയസ്സുള്ള കുട്ടികളും ഉള്‍പ്പെടുന്നു. ആരുടെയും നില ഗുരുതരമല്ല.
പൂനൂർ സ്വദേശി അബൂബക്കർ, ഷബ്‌ന, സൈദ, ഫിറോസ്, ദിയ ഫെബിൻ, മുഹമ്മദ്‌ റസൻ എന്നിവരെയാണ് ആശുപത്രിയിൽ പ്രവേശിപ്പിച്ചത്. വീടിനടുത്തുള്ള പറമ്പിൽ നിന്നും കിട്ടിയ കൂൺ അയൽവാസികളായ രണ്ടു കുടുംബങ്ങളാണ് ഇന്നലെ പാകം ചെയ്തു കഴിച്ചത്.
ഇവര്‍ കഴിച്ചത് വിഷക്കൂണ്‍ ആണെന്നാണ് കരുതുന്നത്. പിന്നാലെ കുട്ടികളടക്കം ആറുപേര്‍ക്ക് ഛര്‍ദിയും ശാരീരികാസ്വാസ്ഥതകളും അനുഭവപ്പെട്ടു. ഇതോടെ ഇവരെ താമരശ്ശേരി താലൂക്ക് ആശുപത്രിയിലും പിന്നീട് കോഴിക്കോട് മെഡിക്കല്‍ കോളേജ് ആശുപത്രിയിലും പ്രവേശിപ്പിക്കുകയായിരുന്നു.