തിരുവനന്തപുരം: പാങ്ങോട് സൈനിക ക്യാമ്പിലെ ആനക്കൊമ്പ് മോഷണക്കേസില് കളളന് കപ്പലില് തന്നെയെന്ന് സൂചന.പ്രതി ക്യാമ്പില് ഉള്ള ആളെന്നാണ് പൊലീസ് നിഗമനം.വിരലടയാള വിദഗ്ധരും ഫോറന്സിക് സംഘവും പരിശോധന നടത്തി. പൊലീസിന് സംശയമുളള ആളുടെ വിരലടയാളവും ശേഖരിച്ചു.
അതീവ സുരക്ഷയുള്ള പാങ്ങോട് കരസേനാ ക്യാമ്പില് സൂക്ഷിച്ചിരുന്ന രണ്ടു കോടി രൂപ മൂല്യമുള്ള രണ്ട് ആന കൊമ്പുകളാണ് കവര്ന്നത്.ഓഫീസേഴ്സ് മെസില് കഴിഞ്ഞ ബുധനാഴ്ച രാത്രിക്കും വ്യാഴാഴ്ച്ച പുലര്ച്ചയ്ക്കും മധ്യേയാണ് മോഷണം നടന്നത്.ബുധനാഴ്ച രാത്രി മെസില് നടന്ന ഡിജെ പാര്ട്ടിക്കിടെയാണ് മോഷണം നടന്നതെന്ന നിഗമനത്തില് പൂജപ്പുര പൊലീസ് അന്വേഷണം നടത്തി വരുന്നതിനിടെയാണ് വഴിത്തിരിവ്.
ഡി ജെ പാര്ട്ടിക്കായി പുറത്തുനിന്നെത്തിയ സംഘത്തിലെ 19 പേരെ പൂജപ്പുര പൊലീസ് വിളിച്ചു വരുത്തി ചോദ്യം ചെയ്തു. എന്നാല്, ഇവരാണ് മോഷണത്തിന് പിന്നിലെന്ന് ഉറപ്പിക്കുന്ന തെളിവുകള് ഇല്ല. പാങ്ങോട് ക്യാമ്പിനെ കുറിച്ചു നന്നായി അറിയാവുന്നവര് നടത്തിയ മോഷണമെന്ന് പൊലീസിന്റെ നിലവിലെ നിഗമനം.തുടര്ന്നാണ് വിരലടയാള വിദഗ്ധരും ഫോറന്സിക് സംഘവും പരിശോധന നടത്തിയത്.
കര്ശന പരിശോധന കഴിഞ്ഞേ സൈനിക സ്റ്റേഷനിലേക്ക് കയറാനും ഇറങ്ങാനും സാധിക്കു. ഈ സാഹചര്യത്തില് ആനക്കൊമ്പുകള് പുറത്തേക്ക് കടത്താന് വഴിയില്ലെന്നും സംശയമുണ്ട്.സേനാ സ്റ്റേഷന് അകത്തെയും പുറത്തെയും സിസിടിവി ദൃശ്യങ്ങള് പൊലീസ് പരിശോധിക്കുന്നുണ്ട്.