പാലക്കാട്: കോണ്‍ഗ്രസ് മണ്ഡലം പ്രസിഡന്റ് പാര്‍ട്ടിവിട്ടതിനെ തുടര്‍ന്ന് പാലക്കാട് കോട്ടായിലെ കോണ്‍ഗ്രസ് ഓഫീസ് സിപിഎം പ്രവര്‍ത്തകര്‍ പിടിച്ചു.കോട്ടായി മണ്ഡലം പ്രസിഡന്റ് മോഹന്‍കുമാറും സിപിഎം പ്രാദേശിക നേതാക്കളും ചേര്‍ന്നാണ് പൊലീസ് പൂട്ടിയ ഓഫീസിന്റെ വാതില്‍ പൊളിച്ച് അകത്തു കയറിയത്.
കോണ്‍ഗ്രസ് കൊടിമരം മുറിച്ചു മാറ്റിയ സിപിഎം പ്രവര്‍ത്തകര്‍ പാര്‍ട്ടി പതാകയും ഫ്‌ലക്‌സും സ്ഥാപിച്ചു.നേരത്തേ മോഹന്‍കുമാറിന്റെ നേതൃത്വത്തില്‍ മണ്ഡലം കമ്മിറ്റി ഓഫീസില്‍ ചുവപ്പ് പെയിന്റടിക്കാന്‍ നടന്ന ശ്രമം സംഘര്‍ഷത്തിലെത്തിയിരുന്നു.തുടര്‍ന്ന് പൊലീസ് ഓഫീസ് പൂട്ടിയെടുത്തു.
പാര്‍ട്ടി ഓഫീസ് പ്രവര്‍ത്തിക്കുന്ന വാടക കെട്ടിടത്തിന്റെ കരാര്‍ ഒപ്പുവച്ചിരിക്കുന്നത് താനാണെന്നും താന്‍ പിന്തുണയ്‌ക്കുന്ന പാര്‍ട്ടിയുടെ ഓഫീസായി കെട്ടിടത്തെ മാറ്റുമെന്നും മോഹന്‍കുമാര്‍ പറഞ്ഞു. എന്നാല്‍ 72 വര്‍ഷമായി പ്രവര്‍ത്തിക്കുന്ന പാര്‍ട്ടി ഓഫീസ് സിപിഎമ്മിന് വിട്ടുകൊടുക്കില്ലെന്ന് കോണ്‍ഗ്രസ് പ്രവര്‍ത്തകര്‍ പറഞ്ഞു.