ന്യൂദല്‍ഹി: ലോകത്തിലെ വളരെ ചുരുക്കം രാജ്യങ്ങളുടെ കയ്യില്‍ മാത്രമേ മുങ്ങിക്കപ്പലുകളെ ആകാശത്ത് നിന്നും വേട്ടയാടാന്‍ കെല്‍പുള്ള യുദ്ധവിമാനങ്ങളുള്ളൂ. അതാണ് പി8ഐ പൊസീഡൊണ്‍ എന്ന യുദ്ധവിമാനം. ശരിക്കും പറഞ്ഞാല്‍ കടലിലെ വെള്ളം പോലുമറിയാതെ, സബ് മറൈനുകളെ അഥവാ മുങ്ങിക്കപ്പലുകളെ വേട്ടയാടിപ്പിടിക്കാന്‍ പ്രാപ്തിയുള്ള കഴുകന്‍ എന്നും പി8ഐ പൊസീഡൊണെ വിളിക്കാം.

ഇപ്പോള്‍ വര്‍ഷങ്ങളോളം കടലിനടിയില്‍ മുങ്ങിക്കിടക്കാന്‍ കഴിയുന്ന മുങ്ങിക്കപ്പലുകള്‍ അമേരിക്കയ്‌ക്കും യൂറോപ്യന്‍ രാജ്യങ്ങള്‍ക്കും ചൈനയ്‌ക്കും ഉണ്ട്. ആണവോര്‍ജ്ജത്തില്‍ പ്രവര്‍ത്തിക്കുന്നതിനാലാണ് ഈ മുങ്ങിക്കപ്പലുകള്‍ക്ക് വര്‍ഷങ്ങളോളം കടലിനടിയില്‍ ആരുമറിയാതെ മുങ്ങിക്കിടക്കാന്‍ സാധിക്കുന്നത്. ഇവയെ കൃത്യമായി അടയാളപ്പെടുത്തിയില്ലെങ്കില്‍ ഒരു യുദ്ധസാഹചര്യത്തില്‍ ഈ മുങ്ങിക്കപ്പലുകളില്‍ നിന്നുണ്ടാകുന്ന ആക്രമണങ്ങള്‍ മാരകമായേക്കൂം. ഇവിടെയാണ് പി8ഐ പൊസീഡൊണ്‍ എന്ന യുദ്ധവിമാനത്തിന്റെ പ്രാധാന്യം ഏറുന്നത്.

പി8ഐ പൊസീഡൊണ്‍ കടലിനടിയില്‍ മുങ്ങിക്കിടക്കുന്ന മുങ്ങിക്കപ്പലിന്റെ ലൊക്കോഷന്‍ ആകാശത്ത് നിന്നേ അടയാളപ്പെടുത്തും. അമേരിക്കയില്‍ നിന്നാണ് സാമുദ്രിക നിരീക്ഷണം സാധ്യമാക്കുന്ന പി8ഐ പൊസീഡൊണ്‍ ഇന്ത്യ വാങ്ങിയതെങ്കിലും ഈ വിമാനത്തെ ഇന്ത്യയ്‌ക്ക് ഉതകുന്ന രീതിയില്‍ മാറ്റങ്ങള്‍ വരുത്തിയിട്ടുണ്ട്. അമേരിക്കയിലെ ബോയിംഗ് കമ്പനി നിര്‍മ്മിച്ച പി8ഐ പൊസീഡൊണ്‍ ഇന്ത്യയുടെ സാങ്കേതിക വിദ്യകൂടി കൂട്ടിച്ചേര്‍ത്തതോടെയാണ് കൂടുതല്‍ അപകടകാരിയായിട്ടുള്ളത്.

ഇപ്പോള്‍ ഇന്ത്യന്‍ നാവികസേനയുടെ പക്കല്‍ 12 പി8ഐ പൊസീഡൊണ്‍ ഉണ്ട്. ഇവ രണ്ട് യുദ്ധക്കപ്പലുകളിലായി വിന്യസിച്ചിരിക്കുന്നു.തമിഴ്നാട്ടിലെ യുദ്ധക്കപ്പലായ ഐഎന്‍എസ് രജാലിയിലും ഗോവയിലുള്ള യുദ്ധക്കപ്പലായ ഐഎന്‍എസ് ഹന്‍സയിലും. ഇനി ബോയിങ്ങില്‍ നിന്നും ആറ് പി8ഐ പൊസീഡൊണ്‍ കൂടി ഇന്ത്യയുടെ ആവശ്യങ്ങള്‍ക്കനുസരിച്ച് മാറ്റങ്ങള്‍ വരുത്തി വാങ്ങാന്‍ പദ്ധതിയുണ്ട്.