കൊച്ചി: നടനും സംവിധായകനുമായ നാദിര്‍ഷായുടെ വളര്‍ത്തു പൂച്ച ചക്കര ചത്തതു ഹൃദയാഘാതം മൂലമെന്നു പോസ്‌റ്റ്മോര്‍ട്ടം റിപ്പോര്‍ട്ട്‌. പേര്‍ഷ്യന്‍ വളര്‍ത്തുപൂച്ചയെ എറണാകുളം മാമംഗലത്തെ മൃഗാശുപത്രി അധികൃതര്‍ കൊന്നെന്നായിരുന്നു ആരോപണം.
ആശുപത്രിക്കെതിരേ നാദിര്‍ഷാ പാലാരിവട്ടം പോലീസില്‍ പരാതി നല്‍കുകയും ചെയ്‌തിരുന്നു. എന്നാല്‍, കഴുത്തില്‍ വലിഞ്ഞു മുറുക്കിയ പാടുകള്‍ ഇല്ലെന്നാണു ജില്ലാ വെറ്ററിനറി മേധാവി പോലീസിനു കൈമാറി റിപ്പോര്‍ട്ടില്‍ പറയുന്നത്‌. പൂച്ചയ്‌ക്കു നേരത്തേ തന്നെ ഹൃദ്രോഗം ഉണ്ടായിരുന്നതായും ഈ സാഹചര്യത്തില്‍ മയക്കാന്‍ കുത്തിവച്ചപ്പോള്‍ ഹൃദയാഘാതം സംഭവിച്ചുവെന്നുമാണു റിപ്പോര്‍ട്ട്‌.
നാദിര്‍ഷായുടെ ആരോപണങ്ങള്‍ ആശുപത്രി അധികൃതര്‍ നേരത്തേ തന്നെ നിഷേധിച്ചിരുന്നു. പൂച്ചയ്‌ക്ക് അനസേ്‌തഷ്യ നല്‍കിയത്‌ ഡോക്‌ടര്‍ തന്നെയാണെന്നും വീഴ്‌ച ഉണ്ടായിട്ടില്ലെന്നുമാണ്‌ ആശുപത്രി ഉടമ ഡോ. അനീഷ്‌ ആന്റണി പറഞ്ഞത്‌. കൃത്യമായ അളവിലാണു മരുന്നു നല്‍കിയത്‌. പെട്ടെന്നാണ്‌ ഹൃദയസ്‌തംഭനമുണ്ടായതെന്നും അദ്ദേഹം പറഞ്ഞു.