ബീജിംഗ്: പ്രണയത്തിലൂടെ ജീവിതം ആസ്വദിച്ചാല്‍ 11,000 രൂപ അധികമായി ശമ്പളം നല്‍കാമെന്ന് ജീവനക്കാര്‍ക്ക് മുന്നില്‍ കിടിലന്‍ ഓഫര്‍ വെച്ചിരിക്കുകയാണ് ചൈനയിലെ കാമറാ കമ്പനി.

ചൈനയിലെ ഷെൻഷെൻ ആസ്ഥാനമായുള്ള കാമറാ കമ്പനിയായ ഇൻസ്റ്റാ 360 പ്രണയത്തെ പ്രോത്സാഹിപ്പിക്കുന്നത്. ജീവനക്കാർക്ക് പ്രണയിക്കാൻ അധിക ശമ്പളവും കമ്പനി ഓഫർ ചെയ്യുന്നതായി സൗത്ത് ചൈന മോർണിംഗ് പോസ്റ്റ് റിപ്പോർട്ട് ചെയ്യുന്നു.

ഒരു വ്യക്തിയ്‌ക്ക് തങ്ങളുടെ ഓൺലൈൻ ഡേറ്റിംഗ് പ്ലാറ്റ്ഫോം പരിചയപ്പെടുത്തി അവരുമായുള്ള പ്രണയം മൂന്നുമാസം തുടരുകയും ചെയ്താൽ തൊഴിലാളികൾക്ക് 1,000 യുവാൻ (11,000 രൂപ) പ്രതിഫലം അധികമായി നൽകും. കൂടാതെ കമ്പനിയുടെ ഡേറ്റിംഗ് പ്ലാറ്റ്ഫോമിനെ കുറിച്ച് സോഷ്യൽ മീഡിയയിൽ ഇടുന്ന പോസ്റ്റുകളിലൂടെ ലൈക്കും കമന്റും ഷെയറും കൂട്ടിയാൽ അതിനും പ്രതിഫലം വേറെ ലഭിക്കും. അടുത്ത കാലത്തായി, ചൈനയിൽ വിവാഹ നിരക്കിൽ വലിയ കുറവാണ് സംഭവിച്ചിരിക്കുന്നത്.

2024ന്റെ ആദ്യ ഘട്ടത്തിൽ 4.74 ദശലക്ഷം ചൈനീസ് ദമ്പതികൾ വിവാഹങ്ങൾ രജിസ്റ്റർ ചെയ്തു, എന്നാൽ കഴിഞ്ഞ വർഷം ഇതേ കാലയളവിൽ രജിസ്റ്റർ ചെയ്തതില്‍ നിന്ന് 16.6 ശതമാനം കുറവാണിത് . പ്രണയിക്കുവാൻ പ്രോത്സാഹിപ്പിക്കുന്ന ഇൻസ്റ്റാ 360 കമ്പനിയുടെ വാർത്ത സാമൂഹിക മാധ്യമങ്ങളിൽ ഇടംപിടിച്ചതോടെ തൊഴിൽ അന്വേഷിച്ചെത്തുന്നവരുടെ എണ്ണം ഗണ്യമായി വർധിച്ചു. ഞങ്ങൾ ആഗ്രഹിച്ച ജോലി ഇതാണെന്ന് ചൈനയിലെ യുവ ജനത പറയുന്നതായും സൗത്ത് ചൈന മോർണിംഗ് പോസ്റ്റ് പറയുന്നു.