ന്യൂദല്‍ഹി: രാജ്യത്ത് സ്വാതന്ത്ര്യാനന്തരമുണ്ടായ എല്ലാ പ്രതിഷേധങ്ങളെയും, പ്രത്യേകിച്ച് 1974 ന് ശേഷം നടന്ന പ്രതിഷേധങ്ങളെ, കുറിച്ച് പഠിക്കാന്‍ ബ്യൂറോ ഓഫ് പൊലീസ് റിസര്‍ച്ച് ആന്‍ഡ് ഡെവലപ്മെന്റിനോട് (ബിപിആര്‍ ആന്‍ഡ് ഡി) കേന്ദ്ര ആഭ്യന്തര മന്ത്രി അമിത് ഷാ ആവശ്യപ്പെട്ടതായി ദി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തു. ഭാവിയില്‍ ‘നിക്ഷിപ്ത താല്‍പ്പര്യക്കാരുടെ ബഹുജന പ്രക്ഷോഭങ്ങള്‍’ തടയുന്നതിനുള്ള ഒരു നടപടിയായി, ആ പ്രതിഷേധങ്ങളുടെ ‘സാമ്പത്തിക വശങ്ങള്‍’, അന്തിമ ഫലങ്ങള്‍, ‘തിരശീലയ്‌ക്ക് പിന്നിലുള്ളവര്‍’ എന്നിവ ബ്യൂറോ പരിശോധിച്ച് ഒരു സ്റ്റാന്‍ഡേര്‍ഡ് ഓപ്പറേറ്റിംഗ് നടപടിക്രമം കൊണ്ടുവരണമെന്ന് അദ്ദേഹം ആഗ്രഹിക്കുന്നുവെന്നാണ് വാര്‍ത്തയില്‍.
ജൂലൈയില്‍ ഇന്റലിജന്‍സ് ബ്യൂറോ സംഘടിപ്പിച്ച രണ്ട് ദിവസത്തെ ‘ദേശീയ സുരക്ഷാ തന്ത്ര സമ്മേളനം-2025’ ല്‍ അമിത് ഷാ സംസാരിച്ചപ്പോഴാണ് ഈ നിര്‍ദ്ദേശങ്ങള്‍ പുറപ്പെടുവിച്ചതെന്നാണ് വാര്‍ത്തയില്‍ പറയുന്നത്.
‘തിരശീലയ്‌ക്ക് പിന്നിലുള്ളവര്‍ ഉള്‍പ്പെടെ, ആ പ്രതിഷേധങ്ങളുടെ കാരണങ്ങള്‍, രീതികള്‍, ഫലങ്ങള്‍ എന്നിവ വിശകലനം ചെയ്യാന്‍ ബിപിആര്‍ ആന്‍ഡ് ഡിയോട് പ്രത്യേകം ആവശ്യപ്പെട്ടിട്ടുണ്ട്,’ ഒരു മുതിര്‍ന്ന സര്‍ക്കാര്‍ ഉദ്യോഗസ്ഥനെ ഉദ്ധരിച്ച് ദി ഇന്ത്യന്‍ എക്‌സ്പ്രസ് എഴുതുന്നു. ‘ഭാവിയില്‍ നിക്ഷിപ്ത താല്‍പ്പര്യക്കാരുടെ ബഹുജന പ്രക്ഷോഭങ്ങള്‍ തടയുന്നതിന് പഠനത്തിന്റെ ഫലത്തെ അടിസ്ഥാനമാക്കി ഒരു എസ്ഒപി രൂപീകരിക്കണമെന്ന് നിര്‍ദ്ദേശിച്ചിട്ടുണ്ട്.’
കേന്ദ്ര ആഭ്യന്തര മന്ത്രാലയത്തിന് കീഴില്‍ പ്രവര്‍ത്തിക്കുന്ന ബിപിആര്‍ ആന്‍ഡ് ഡി, ഇത് പരിശോധിക്കാന്‍ ഒരു കമ്മിറ്റി രൂപീകരിക്കുന്ന പ്രക്രിയയിലാണെന്ന് റിപ്പോര്‍ട്ടുണ്ട്. ഈ സംഘം ‘സംസ്ഥാന പൊലീസ് വകുപ്പുകളുമായി അവരുടെ കുറ്റകൃത്യ അന്വേഷണ വകുപ്പുകളുടെ റിപ്പോര്‍ട്ടുകള്‍ ഉള്‍പ്പെടെ പഴയ കേസ് ഫയലുകള്‍ക്കായി ഏകോപിപ്പിക്കു’മെന്നും വാര്‍ത്ത വിശദീകരിക്കുന്നു.