കൊല്‍ക്കത്ത: അടിസ്ഥാനസൗകര്യ വികസനത്തില്‍ രാജ്യത്തിന്റെ ഇതര ഭാഗങ്ങള്‍ക്കൊപ്പം പശ്ചിമ ബംഗാളിനെ മുന്‍നിരയിലെത്തിക്കുന്നതില്‍ പ്രധാനമന്ത്രി നരേന്ദ്രമോദി പുലര്‍ത്തുന്ന പ്രത്യേക താല്പര്യത്തെ ഗവര്‍ണര്‍ ഡോ സി.വി ആനന്ദ ബോസ് പ്രശംസിച്ചു.
അലിപുര്‍ദുവാര്‍, കൂച്ച് ബെഹാര്‍ ജില്ലകളില്‍ 1,010 കോടി രൂപയുടെ നഗര വാതക വിതരണ പദ്ധതി (സിജിഡി)ക്ക് തറക്കല്ലിടാന്‍ പ്രധാനമന്ത്രി നടത്തിയ സംസ്ഥാന സന്ദര്‍ശനത്തെ ബംഗാളിന്റെ ‘മഹത്തായ ആഘോഷാവസര’മെന്ന് ഗവര്‍ണര്‍ വിശേഷിപ്പിച്ചു.
ഭാരതം ഒരു വികസിത രാഷ്‌ട്രമായി മുന്നേറുമ്പോള്‍ അതിനുള്ള ബൃഹദ്പദ്ധതികളില്‍ പ്രധാനമന്ത്രി ബംഗാളിന് നല്‍കുന്ന പ്രത്യേക പരിഗണനയുടെ പ്രത്യക്ഷോദാഹരണമാണ് അദ്ദേഹത്തിന്റെ ബംഗാള്‍ സന്ദര്‍ശനം.
നഗര വാതക വിതരണ ശൃംഖല വികസിപ്പിച്ച് ഭാരതമൊട്ടാകെ ശുദ്ധമായ ഊര്‍ജ്ജ ലഭ്യത വര്‍ദ്ധിപ്പിക്കുന്നതിനുള്ള വികസനപദ്ധതിയിലെ സുപ്രധാന ചുവടുവയ്‌പ്പാണ് അലിപൂര്‍ദ്വാറിലും കൂച്ച് ബെഹാറിലും രണ്ടരലക്ഷത്തിലധികം കുടുംബങ്ങള്‍ക്ക് ശുദ്ധവും സുരക്ഷിതവും താങ്ങാനാവുന്ന വിലയിലുള്ളതുമായ പൈപ്പ് ഗ്യാസ് സൗകര്യം ലഭ്യമാക്കുന്ന
പദ്ധതി. അത് വെറുമൊരു പൈപ്പ് ലൈന്‍ സംരംഭമല്ല, മറിച്ച് അവശ്യ സേവനങ്ങള്‍ വീട്ടുപടിക്കല്‍ എത്തിക്കുന്നതിനുള്ള കേന്ദ്രസര്‍ക്കാരിന്റെ പ്രതിബദ്ധതയുടെ തെളിവാണ് -ആനന്ദബോസ് പറഞ്ഞു.
അടുത്തിടെ ഇന്ത്യന്‍ സായുധസേന ഏറ്റെടുത്ത ‘ഓപ്പറേഷന്‍ സിന്ദൂറി’ ന്റെ വിജയപശ്ചാത്തലത്തില്‍ പ്രധാനമന്ത്രിയുടെ സംസ്ഥാന സന്ദര്‍ശനത്തിന്റെ പ്രതീകാത്മക പ്രാധാന്യവും ഗവര്‍ണര്‍ ആനന്ദബോസ് എടുത്തുപറഞ്ഞു.