ലക്നൗ : ബംഗ്ലാദേശിൽ നിന്ന് കുടിയിറക്കപ്പെട്ട കുടുംബങ്ങളുടെ പുനരധിവാസം സംബന്ധിച്ച് സുപ്രധാന തീരുമാനവുമായി യുപി സർക്കാർ. നിലവിൽ ഉത്തർപ്രദേശിലെ മീററ്റ് ജില്ലയിൽ താമസിക്കുന്ന 99 ഹിന്ദു ബംഗാളി കുടുംബങ്ങൾക്ക് 0.50 ഏക്കർ ഭൂമി നൽകാനാണ് തീരുമാനം. മുഖ്യമന്ത്രി യോഗി ആദിത്യനാഥിന്റെ അധ്യക്ഷതയിൽ ചേർന്ന മന്ത്രിസഭാ യോഗം ഈ നിർദ്ദേശത്തിന് അംഗീകാരം നൽകി.

മീററ്റ് ജില്ലയിലെ മവാന തഹ്‌സിലിലുള്ള നഗ്ല ഗുസായ് ഗ്രാമവുമായി ബന്ധപ്പെട്ടതാണ് കേസ്. കിഴക്കൻ പാകിസ്ഥാനിൽ നിന്ന് കുടിയിറക്കപ്പെട്ട 99 ഹിന്ദു ബംഗാളി കുടുംബങ്ങൾ ദീർഘകാലമായി തടാകക്കരയിലെ ഭൂമിയിൽ നിയമവിരുദ്ധമായി താമസിച്ചുവരികയാണ്.

കാബിനറ്റ് തീരുമാനമനുസരിച്ച്, കാൺപൂർ ദേഹത്ത് ജില്ലയിലെ റസുലാബാദ് തഹ്‌സിലിൽ 99 കുടുംബങ്ങളെയും പുനരധിവസിപ്പിക്കും. ഭൈൻസ ഗ്രാമത്തിൽ പുനരധിവാസ വകുപ്പിന്റെ പേരിൽ രജിസ്റ്റർ ചെയ്തിട്ടുള്ള 11.1375 ഹെക്ടർ (27.5097 ഏക്കർ) ഭൂമിയിൽ അമ്പത് കുടുംബങ്ങളെ താമസിപ്പിക്കും. ശേഷിക്കുന്ന 49 കുടുംബങ്ങളെ താജ്പൂർ തർസൗലി ഗ്രാമത്തിൽ പുനരധിവാസ വകുപ്പിന്റെ പേരിൽ രജിസ്റ്റർ ചെയ്തിട്ടുള്ള 10.530 ഹെക്ടർ (26.009 ഏക്കർ) ഭൂമിയിൽ താമസിപ്പിക്കും.

ഓരോ കുടുംബത്തിനും 0.50 ഏക്കർ ഭൂമി അനുവദിക്കും. ഈ ഭൂമി 30 വർഷത്തെ പാട്ടത്തിന് നൽകും. ഇത് 30 വർഷത്തേക്ക് കൂടി പുതുക്കാവുന്നതാണ്. അങ്ങനെ, പരമാവധി പാട്ടക്കാലാവധി 90 വർഷമായിരിക്കും. പരിസ്ഥിതി സംരക്ഷണത്തോടൊപ്പം കുടിയിറക്കപ്പെട്ട കുടുംബങ്ങളുടെ അന്തസ്സും സുരക്ഷിതവുമായ പുനരധിവാസവും ഈ തീരുമാനം വഴി ഉറപ്പാക്കും. ബംഗ്ലാദേശിൽ ന്യൂനപക്ഷമായ ഹിന്ദുക്കൾ പീഡനങ്ങൾ അനുഭവിക്കുന്നതിനിടെയാണ് യോഗി ആദിത്യനാഥിന്റെ പുതിയ തീരുമാനം.