ദുബൈ: വസ്ത്രത്തിന്റെ ബട്ടണുകളില്‍ മയക്കുമരുന്ന് ഗുളികകള്‍ ഒളിപ്പിച്ച് കടത്തുന്ന സംഘം ദുബൈ പൊലീസിന്റെ പിടിയില്‍. ഇതിന് 4.5 മില്യണ്‍ ദിര്‍ഹം വില വരും. യുഎഇയില്‍ നിന്ന് പുറത്തേക്ക് കടത്താന്‍ തയ്യാറാക്കി വച്ചിരുന്ന 90,000 ഗുളികകള്‍ കണ്ടെത്തിയതായി പൊലീസ് പറഞ്ഞു.

വസ്ത്രങ്ങളുടെ ബട്ടണുകളില്‍ ഒളിപ്പിച്ച് ഏകദേശം 90,000 കാപ്റ്റഗണ്‍ ഗുളികകള്‍ കടത്താന്‍ ശ്രമിച്ച ഒരു ക്രിമിനല്‍ സംഘത്തെയാണ് ദുബൈ പൊലീസ് പരാജയപ്പെടുത്തിയത്.സൗദി അധികാരികളുടെ സഹകരണത്തോടെ നടത്തിയ ഓപ്പറേഷനില്‍, സംഘത്തിന്റെ പരിസരം റെയ്ഡ് ചെയ്ത് ബട്ടണുകള്‍ക്കുള്ളില്‍ ഒളിപ്പിച്ച കാപ്സ്യൂളുകള്‍ കണ്ടെത്തി. 18.9 കിലോഗ്രാം ഭാരവും 4.48 മില്യണ്‍ ദിര്‍ഹം വിലമതിക്കുന്നതുമായ മയക്കുമരുന്ന് വിദേശത്തേക്ക് കടത്തുന്നതിന് മുമ്പ് തന്നെ പിടികൂടുകയായിരുന്നു. മറ്റൊരാളുടെ നിര്‍ദ്ദേശപ്രകാരം യുഎഇയില്‍ നിന്ന് വിദേശത്തേക്ക് മയക്കുമരുന്ന് മാറ്റാന്‍ തയ്യാറെടുക്കുന്ന രണ്ട് അറബികളും ഒരു ഏഷ്യക്കാരനും അടങ്ങുന്ന ഒരു സംഘത്തെക്കുറിച്ച് വിവരം ലഭിച്ചതിനെത്തുടര്‍ന്ന് ദുബൈ പൊലീസ് ഓപ്പറേഷന്‍ ടോക്സിക് ബട്ടണ്‍സ് ആരംഭിച്ചു. സംശയിക്കപ്പെടുന്നവരുടെ നീക്കങ്ങള്‍, വാഹനങ്ങള്‍, താമസസ്ഥലങ്ങള്‍ എന്നിവ നിരീക്ഷണത്തിലാക്കി. ദുബൈയിലെ ഒരു അപ്പാര്‍ട്ട്മെന്റില്‍ നിന്നും മറ്റൊരു എമിറേറ്റിലെ ഒരു വസ്തുവില്‍ നിന്നും മയക്കുമരുന്ന് കണ്ടെത്തുന്നതിലേക്ക് നയിച്ചു.

നേരത്തെ ഷാര്‍ജ പൊലീസ് 3.5 ദശലക്ഷം ക്യാപ്റ്റഗണ്‍ ഗുളികകള്‍ വിതരണം ചെയ്യാനുള്ള ശ്രമം വിജയകരമായി പരാജയപ്പെടുത്തിയിരുന്നു.
ഏകദേശം 585 കിലോഗ്രാം ഭാരമുള്ള നിയമവിരുദ്ധ ഗുളികകള്‍ക്ക് 19 ദശലക്ഷം ദിര്‍ഹം വില കണക്കാക്കിയിരുന്നു. വ്യാപകമായ ഉപയോഗത്തെക്കുറിച്ചുള്ള ആശങ്കകള്‍ കാരണം സമീപ വര്‍ഷങ്ങളില്‍ മേഖലയിലെ രാജ്യങ്ങള്‍ ക്യാപ്റ്റഗണ്‍ കള്ളക്കടത്ത് തടയാനുള്ള ശ്രമങ്ങള്‍ ശക്തമാക്കിയിട്ടുണ്ട്. 2019 നും 2023 നും ഇടയില്‍, മിഡില്‍ ഈസ്റ്റില്‍ പിടിച്ചെടുത്ത ക്യാപ്റ്റഗണിന്റെ ഏകദേശം 82 ശതമാനവും സിറിയയില്‍ നിന്നാണെന്നും ബാക്കി 17 ശതമാനം ലെബനനില്‍ നിന്നാണെന്നും കണക്കാക്കിയിരുന്നു. യുഎസ് ആസ്ഥാനമായുള്ള തിങ്ക് ടാങ്കായ ന്യൂ ലൈന്‍സ് ഇന്‍സ്റ്റിറ്റ്യൂട്ടിന്റെ കണക്കനുസരിച്ച്, ആഗോള ക്യാപ്റ്റഗണ്‍ വിപണി പ്രതിവര്‍ഷം ഏകദേശം 10 ബില്യണ്‍ ഡോളറാണ്. 80ശതമാനം അല്‍ അസദിന്റെ പതനത്തിന് മുമ്പ് സിറിയയിലാണ് ഉല്‍പ്പാദിപ്പിച്ചിരുന്നത്. മിഡില്‍ ഈസ്റ്റിലെ ഒരു പ്രധാന ദേശീയ സുരക്ഷാ ഭീഷണിയായി മയക്കുമരുന്നിന്റെ അതിര്‍ത്തി കടന്നുള്ള ഒഴുക്ക് വളരെക്കാലമായി കണക്കാക്കപ്പെടുന്നു. 2018 മുതല്‍ സിറിയയില്‍ നിന്ന് മറ്റ് അറബ് രാജ്യങ്ങളിലേക്ക് കാപ്റ്റഗണില്‍ പ്രതിവര്‍ഷം കോടിക്കണക്കിന് ഡോളര്‍ ഒഴുകിയിരുന്നു.
ഒരു ഗുളിക ഉത്പാദിപ്പിക്കാന്‍ കുറച്ച് യുഎസ് സെന്റ് മാത്രമേ ചിലവാകൂ. എന്നാല്‍ ഗുളികകള്‍ അറബ് രാജ്യങ്ങളില്‍ ഓരോന്നിനും 20 ഡോളര്‍ വരെ വിലക്ക് വിറ്റിരുന്നു.