കറാച്ചി : ബലൂചിസ്ഥാനിൽ 450 യാത്രക്കാരുമായി സഞ്ചരിച്ചിരുന്ന പാസഞ്ചർ ട്രെയിനായ ജാഫർ എക്സ്പ്രസ് തട്ടിക്കൊണ്ടുപോയതിന്റെ വിശദാംശങ്ങൾ പുറത്ത് വിട്ട് ബലൂച് ലിബറേഷൻ ആർമി. ട്രെയിൻ കടത്തിക്കൊണ്ട് പോയി ഏകദേശം രണ്ട് മാസങ്ങൾക്ക് ശേഷമാണ് ബലൂച് ലിബറേഷൻ ആർമിയുടെ മാധ്യമ വിഭാഗമായ ഹക്കൽ അതിന്റെ പ്രവർത്തനത്തിന്റെ വിശദമായ 35 മിനിറ്റ് വീഡിയോ പുറത്തുവിട്ടത്.

ബലൂചിസ്ഥാനെ പാകിസ്ഥാനിൽ നിന്ന് വേർപെടുത്താൻ ശ്രമിക്കുന്ന ബലൂച് ലിബറേഷൻ ആർമി മാർച്ച് 11 ന് റെയിൽ‌വേ ട്രാക്കുകൾ സ്‌ഫോടനത്തിൽ തകർത്താണ് പെഷവാറിലേക്ക് പോകുന്ന ജാഫർ എക്‌സ്പ്രസ് ഹൈജാക്ക് ചെയ്തത്. ദാറ-ഇ-ബോളൻ 2.0 എന്ന രഹസ്യനാമത്തിൽ അറിയപ്പെടുന്ന ഈ ഓപ്പറേഷൻ രണ്ട് ദിവസം നീണ്ടുനിന്നു.

ബി‌എൽ‌എ പോരാളികൾ ട്രെയിൻ ഹൈജാക്ക് ചെയ്ത് യാത്രക്കാരെ ബന്ദികളാക്കുകയും പാകിസ്ഥാനിലുടനീളം പരിഭ്രാന്തി പരത്തുകയും ചെയ്തു. ഓപ്പറേഷനുശേഷം ബലൂച് വിമതർക്ക് കനത്ത നഷ്ടം സംഭവിച്ചുവെന്ന് പാകിസ്ഥാൻ അവകാശവാദത്തെ കാറ്റിൽപ്പറത്തുന്നതാണ് ഈ വീഡിയോ.

ഓപ്പറേഷന്റെ ആദ്യത്തെ വിശദമായ ദൃശ്യ വിവരണം ഈ വീഡിയോ നൽകുന്നുണ്ട്. കൂടാതെ ട്രെയിനിൽ ബിഎൽഎ പോരാളികൾ ഏകോപിപ്പിച്ച് മികച്ച പ്രവർത്തനം നടത്തുന്നതും കാണിക്കുന്നു. ബലൂച് വിമതർ ഓപ്പറേഷൻ ആസൂത്രണം ചെയ്യുന്നതും ട്രെയിൻ ആക്രമിക്കുന്നതിന് മുമ്പ് യുദ്ധവിവരങ്ങളും പരിശീലനവും സ്വീകരിക്കുന്നതും ഇതിൽ കാണിക്കുന്നു.

30 മിനിറ്റ് ദൈർഘ്യമുള്ള വീഡിയോയിൽ ബലൂച് വിമതർ പാളങ്ങളിൽ ബോംബെറിഞ്ഞ് ട്രെയിൻ തട്ടിക്കൊണ്ടുപോയി 200 ലധികം പാകിസ്ഥാൻ ഉദ്യോഗസ്ഥരെ രണ്ട് ദിവസത്തേക്ക് ബന്ദികളാക്കിയതും കാണിക്കുന്നു. വിവേചനരഹിതവും ക്രൂരവുമായ സംഭവമാണെന്ന് പാകിസ്ഥാൻ സൈന്യം വിശേഷിപ്പിച്ചതിന് വിരുദ്ധമായി ഹൈജാക്കിംഗ് സ്ഥലത്ത് നിന്ന് സ്ത്രീകളെയും കുട്ടികളെയും പ്രായമായവരെയും സുരക്ഷിതമായി ഒഴിപ്പിക്കുന്ന ദൃശ്യങ്ങളും ഇതിൽ ഉൾപ്പെടുന്നുണ്ട്.

ആക്രമണത്തിന് പിന്നിലെ ഉദ്ദേശ്യം വിശദീകരിക്കുന്ന ഒരു പോരാളിയുടെ പ്രസ്താവനയോടെയാണ് വീഡിയോ ആരംഭിക്കുന്നത്. “നമ്മുടെ പോരാട്ടവും യുദ്ധവും അത്തരം നിർണായക തീരുമാനങ്ങൾ എടുക്കേണ്ട ഒരു ഘട്ടത്തിലെത്തിയിരിക്കുന്നു. അത്തരം തീരുമാനങ്ങളല്ലാതെ മറ്റ് മാർഗമില്ലെന്ന് അവർക്കറിയാം, കാരണം നമ്മുടെ യുവാക്കൾ അത്തരം നടപടികൾ സ്വീകരിക്കാൻ തയ്യാറാണ്. ഒരു തോക്ക് നിർത്താൻ ഒരു തോക്ക് ആവശ്യമാണ്. ഒരു വെടിയുണ്ടയിൽ നിന്നുള്ള ശബ്ദം ഒരു ഘട്ടത്തിലെത്തും.”- പോരാളി പ്രസംഗത്തിൽ പറയുന്നു.