ആലുവ: എസ്. രമേശന്‍ നായരുടെ ഗുരുപൗര്‍ണ്ണമിയുടെ വ്യാപ്തി വര്‍ണ്ണനകള്‍ക്കതീതമാണെന്ന് കവി ഐ.എസ്. കുണ്ടൂര്‍. ആലുവകേശവസ്മൃതി ഹാളില്‍ ബാലസാഹിതീ പ്രകാശന്‍ സംഘടിപ്പിച്ച കവി എസ്. രമേശന്‍ നായര്‍ അനുസ്മരണ സമ്മേളനം രമേശസ്മൃതി ഉദ്ഘാടനം ചെയ്യുകയായിരുന്നു അദ്ദേഹം.
ഭക്തിയില്ലാത്തവരെക്കൊണ്ടുപോലും ഹരിനാമം ചൊല്ലിച്ച കവിയായിരുന്നു രമേശന്‍ നായര്‍. തിരുക്കുറല്‍ വിവര്‍ത്തനത്തോടെ വിവര്‍ത്തന സാഹിത്യ രംഗത്ത് മുടിചൂടാമന്നനായി തിളങ്ങിയെന്നും ഐ.എസ്. കുണ്ടൂര്‍ പറഞ്ഞു.
വരമൊഴിയുടെ കവിയാണ് കവി എസ്. രമേശന്‍ നായരെന്ന് ബാലഗോകുലം സംസ്ഥാന അധ്യക്ഷന്‍ ആര്‍. പ്രസന്നകുമാര്‍ പറഞ്ഞു. ഋഷികവി പാരമ്പര്യത്തിന്റെ തുടര്‍ച്ചയായിരുന്നു അദ്ദേഹം. ഭാരതം ലോകത്തിനു സംഭാവന ചെയ്ത അദ്വൈത സിദ്ധാന്തത്തിന്റെ പ്രായോജകനായിരുന്നു കവിയെന്നും ആര്‍. പ്രസന്നകുമാര്‍ പറഞ്ഞു.
ബാലസാഹിതി പ്രകാശന്‍ ചെയര്‍മാന്‍ ഡോ. ഗോപി പുതുക്കോട് അധ്യക്ഷത വഹിച്ചു. ജന്മഭൂമി ഡെപ്യൂട്ടി എഡിറ്റര്‍ കാവാലം ശശികുമാര്‍ സംസാരിച്ചു. എസ്. രമേശന്‍ നായരുടെ സഹധര്‍മ്മിണി രമ ടീച്ചറുടെ സാന്നിദ്ധ്യം ശ്രദ്ധേയമായി. ബാലസാഹിതി പ്രകാശന്‍ സംസ്ഥാന ജോയിന്റെ സെക്രട്ടറി എം.എ. അയ്യപ്പന്‍ മാസ്റ്റര്‍ സ്വാഗതവും രമേശ് നൂലേലില്‍ കൃതജ്ഞതയും രേഖപ്പെടുത്തി.