ന്യൂദല്ഹി: ഭാരതപ്പുഴയുടെ തീരത്ത് തിരുനാവായയില് നടന്ന മഹാമാഘ മഹോത്സവത്തെ പ്രശംസിച്ച് പ്രധാനമന്ത്രി നരേന്ദ്ര മോദി. മന് കി ബാത്തിന്റെ 131-ാം പതിപ്പിലായിരുന്നു പ്രധാനമന്ത്രിയുടെ ഈ അഭിനന്ദനം. മഹാമാഘമഹോത്സവം നമ്മുടെ മഹത്തായ സംസ്കാരത്തിന്റെ പ്രവാഹമാണെന്ന് പ്രധാനമന്ത്രി പറഞ്ഞു.
കഴിഞ്ഞവര്ഷം ഇതേ സമയത്ത് നടന്ന മഹാകുംഭ മേളയുടെ അത്ഭുതകരമായ ചിത്രങ്ങള് നിങ്ങള്ക്ക് ഓര്മ്മയുണ്ടാകാം. സംഗമത്തിന്റെ തീരത്ത് ഒഴുകിയെത്തുന്ന ജനസാഗരം, വിശ്വാസത്തിന്റെ അഗാധമായ പ്രവാഹം, സ്നാനത്തിന്റെ പുണ്യ നിമിഷം. ഭാരതം അതിന്റെ സനാതന ചേതനയുമായി വീണ്ടും ഒന്നിക്കുന്നതായി തോന്നി. മഹാകുംഭത്തിന്റെ അതേ പ്രവാഹം, മാഘമാസത്തിന്റെ അതേ ഭക്തിസ്വരം.
കേരളത്തിന്റെ മണ്ണില്, ഭാരതപ്പുഴയുടെ തീരത്തുള്ള തിരുനാവായയില്, നൂറ്റാണ്ടുകള് പഴക്കമുള്ള ഒരു പാരമ്പര്യമുണ്ട് – മാമാങ്കം. ഇത്തവണ ഇതിനെ മഹാമാഘ മഹോത്സവം അല്ലെങ്കില് കേരളകുംഭം എന്നും വിളിക്കുന്നു. മാഘമാസത്തില് പുണ്യനദിയില് കുളിച്ച് ആ നിമിഷത്തെ ജീവിതത്തിലെ അവിസ്മരണീയ നിമിഷമാക്കുന്നത് ഇതിന്റെ ആത്മാവാണ്. ഏകദേശം ഇരുനൂറ്റിയന്പത് വര്ഷമായി മഹാമാഘം ഗംഭീരമായി ആഘോഷിച്ചിരുന്നില്ല. എന്നാല് ഇന്ന് അതിന്റെ പൈതൃകം വീണ്ടും തിരിച്ചറിയുന്ന നമ്മുടെ രാജ്യത്ത് ചരിത്രം ഒരു വഴിത്തിരിവായി. ഇത്തവണ പ്രധാന പ്രഖ്യാപനങ്ങളൊന്നുമില്ലാതെയാണ് മഹാമാഘം വിജയകരമായി സംഘടിപ്പിച്ചത്. ഭക്തര് തിരുനാവായയിലേക്ക് പ്രവഹിച്ചു.
മഹാകുംഭമേളയായാലും കേരള കുംഭമേളയായാലും, ഇത് കേവലം സ്നാനം ചെയ്യുന്ന ഉത്സവമല്ല. ഇത് ഓര്മ്മയുടെ ഉണര്വാണ്. ഇത് സംസ്കാരത്തിന്റെ ഒരു പുനസ്മരണമാണ്. വടക്ക് മുതല് തെക്ക് വരെ നദികള് വ്യത്യസ്തമായിരിക്കാം തീരങ്ങള് വ്യത്യസ്തമായിരിക്കാം പക്ഷേ വിശ്വാസത്തിന്റെ പ്രവാഹം ഒന്നുതന്നെയാണ്. ഇതാണ് ഭാരതമെന്നും പ്രധാനമന്ത്രി കൂട്ടിച്ചേര്ത്തു.