ഭോപ്പാൽ: സംസ്ഥാനത്ത് ഏകീകൃത സിവിൽ കോഡ് (യു.സി.സി) നടപ്പാക്കണമെന്ന ശക്തമായ ആവശ്യവുമായി മധ്യപ്രദേശ് മുഖ്യമന്ത്രി മോഹൻ യാദവ് രംഗത്ത്. രാജ്യത്ത് എല്ലാവർക്കും ഒരൊറ്റ നിയമമായിരിക്കണം ഉണ്ടാവേണ്ടതെന്നും ഒന്നിലധികം പങ്കാളികളെ വിവാഹം കഴിക്കാൻ ആരെയും അനുവദിക്കരുതെന്നും ഒരു പൊതുപരിപാടിയെ അഭിസംബോധന ചെയ്തുകൊണ്ട് അദ്ദേഹം പറഞ്ഞു.
“എന്തുകൊണ്ടാണ് ഹിന്ദുക്കൾക്കും മുസ്ലിങ്ങൾക്കും വ്യത്യസ്ത നിയമങ്ങൾ? എല്ലാവർക്കും ഒരൊറ്റ നിയമം ഉണ്ടായിരിക്കണം. ശ്രീരാമൻ ഒരു തവണ മാത്രം വിവാഹം കഴിക്കുമ്പോൾ, റഹീം എന്തിനാണ് രണ്ട് തവണയോ നാല് തവണയോ വിവാഹം കഴിക്കുന്നത്? മുസ്ലിം സഹോദരിമാരും നമ്മുടെ സഹോദരിമാരാണ്. നിർദിഷ്ട ഏകീകൃത സിവിൽ കോഡ് പ്രകാരം ഇനി മുതൽ ഒരു വിവാഹത്തിന് മാത്രമേ നിയമസാധുത ഉണ്ടായിരിക്കുകയുള്ളൂ,” മുഖ്യമന്ത്രി വ്യക്തമാക്കി.
“നിർദിഷ്ട ഏകീകൃത സിവിൽ കോഡ് അനുസരിച്ച്, ഒരു തവണ മാത്രം വിവാഹം കഴിക്കുന്ന വ്യക്തിക്ക് മാത്രമേ മധ്യപ്രദേശിൽ ജീവിക്കാൻ നിയമപരമായ അവകാശമുണ്ടാവുകയുള്ളൂ. എല്ലാവർക്കും ഒരേയൊരു സംവിധാനം വേണം. എന്തിനാണ് ഇവിടെ വ്യത്യസ്ത നിയമങ്ങൾ?” അദ്ദേഹം ചോദിച്ചു.
“ആരെങ്കിലും ‘തലാഖ്, തലാഖ്, തലാഖ്’ എന്ന് പറഞ്ഞാൽ അവർ ജയിലിലാകും. മുത്തലാഖിന്റെ കാലം കഴിഞ്ഞു. ഇനി ഒരു വിവാഹത്തിന് മാത്രമേ നിയമപരമായ അംഗീകാരം ലഭിക്കൂ,” മുത്തലാഖ് നിരോധനത്തെക്കുറിച്ച് പരാമർശിച്ചുകൊണ്ട് മോഹൻ യാദവ് വ്യക്തമാക്കി.
നിയമം നടപ്പാക്കുന്നതിനുള്ള സർക്കാരിന്റെ മാർഗരേഖയും മുഖ്യമന്ത്രി പരിപാടിയിൽ പ്രഖ്യാപിച്ചു. പൗരന്മാർക്കിടയിൽ യാതൊരുവിധ വിവേചനവും പാടില്ലാത്തതിനാലാണ് ഈ നിയമം മധ്യപ്രദേശിൽ കൊണ്ടുവരുന്നത്. നമ്മളെല്ലാവരും ഭാരതമാതാവിന്റെ മക്കളാണ്. വരാനിരിക്കുന്ന മൺസൂൺ സമ്മേളനത്തിൽ ഈ ബിൽ നിയമസഭയിൽ അവതരിപ്പിക്കും. നിയമസഭയിൽ എത്തിക്കുന്നതിന് മുൻപ്, ഭോപ്പാലിലെ ജഗദീഷ്പൂരിൽ ചേരുന്ന അടുത്ത മന്ത്രിസഭാ യോഗത്തിൽ ബില്ലിന് അംഗീകാരം നൽകുമെന്നും മുഖ്യമന്ത്രി അറിയിച്ചു.