കൊല്ലം: മൊസാംബിക്കിലെ ബെയ്റ തുറമുഖത്ത് കഴിഞ്ഞ വ്യാഴാഴ്ച ഉണ്ടായ കപ്പല്‍ അപകടത്തില്‍ കാണാതായ തേവലക്കര സ്വദേശി ശ്രീരാഗ് രാധാകൃഷ്ണന്റെ മൃതശരീരം തിരിച്ചറിഞ്ഞു. ഷിപ്പിംഗ് ഡയറക്ടര്‍ ജനറല്‍ അധികൃതരാണ് വിവരം എന്‍.കെ. പ്രേമചന്ദ്രന്‍ എം.പി അറിയിച്ചു.
അപകടത്തില്‍ കാണാതായ രണ്ട് മലയാളികളിലൊരാളായിരുന്നു ശ്രീരാഗ്. തിരച്ചിലിനിടെ കണ്ടെത്തിയ മൃതദേഹത്തിലെ വസ്ത്രങ്ങളും വ്യക്തിപരമായ സാധനങ്ങളും രക്ഷപ്പെട്ടവര്‍ തിരിച്ചറിഞ്ഞതിനെ അടിസ്ഥാനപ്പെടുത്തി, അത് ഇലക്ട്രോ ടെക്‌നിക്കല്‍ ഓഫീസറായ ശ്രീരാഗ് രാധാകൃഷ്ണന്റേതാണെന്ന് സ്ഥിരീകരിച്ചു.
മൃതശരീരം പ്രാദേശിക പൊലീസിന് കൈമാറി, തുടര്‍ നിയമനടപടികള്‍ പൂര്‍ത്തിയാക്കി നാട്ടിലേക്ക് അയയ്ക്കാനുള്ള തയ്യാറെടുപ്പുകള്‍ ആരംഭിച്ചിരിക്കുകയാണ്. ഷിപ്പിംഗ് ഡയറക്ടറേറ്റ് തന്നെയാണ് മൃതശരീരം നാട്ടിലേക്ക് കൊണ്ടുവരാനുള്ള ചെലവ് വഹിക്കുക എന്നും, കുടുംബത്തിന് അടിയന്തിരമായി ആശ്വാസധനസഹായം വിതരണം ചെയ്യുമെന്നും അധികൃതര്‍ എം.പിയെ അറിയിച്ചു.
കൂടാതെ, ശ്രീരാഗ് രാധാകൃഷ്ണന്റെ ഇന്‍ഷുറന്‍സ് സംബന്ധിച്ച നടപടികള്‍ സമയബന്ധിതമായി പൂര്‍ത്തിയാക്കി നഷ്ടപരിഹാരം വേഗത്തില്‍ കുടുംബത്തിന് ലഭ്യമാക്കണമെന്നും എന്‍.കെ. പ്രേമചന്ദ്രന്‍ ആവശ്യപ്പെട്ടു.
അതേസമയം, അപകടത്തില്‍ കാണാതായ മറ്റൊരു മലയാളിയായ എറണാകുളം പിറവം സ്വദേശി ഇന്ദ്രജിത്തിന്റെ തിരച്ചില്‍ തുടരുകയാണ്. സാങ്കേതിക പരിമിതികള്‍ രക്ഷാപ്രവര്‍ത്തനത്തെ ബാധിക്കുന്നുവെന്ന് കുടുംബം ആരോപിക്കുകയും, ഇന്ത്യന്‍ നേവി തിരച്ചിലില്‍ പങ്കാളിയാകണമെന്നും ആവശ്യപ്പെട്ടു.
മൊസാംബിക്കിലെ ഈ കപ്പല്‍ അപകടം വിദേശ കപ്പല്‍ ജീവനക്കാരുടെ സുരക്ഷാ സംവിധാനങ്ങളെക്കുറിച്ചുള്ള ആശങ്കകള്‍ വീണ്ടും ഉയര്‍ത്തിയിരിക്കുകയാണ്.