മുത്തോലി ഗ്രാമപഞ്ചായത്ത് പ്രസിഡന്റ് എന്ന നിലയില്‍ സംസ്ഥാനത്തുതന്നെ മാതൃകയായ വികസന പ്രവര്‍ത്തനങ്ങള്‍ നടത്തിയതിന്റെ അത്മവിശ്വാസത്തിലും കരുത്തിലുമാണ് രണ്‍ജിത്ത് ജി. മീനാഭവന്‍. അഞ്ച് വര്‍ഷം രാഷ്‌ട്രീയ എതിരാളികളുടെ പോലും പ്രശംസ പിടിച്ചുപറ്റിയ രണ്‍ജിത്ത് ഇത്തവണ ളാലം ബ്ലോക്ക് മുത്തോലി ഡിവിഷനില്‍ നിന്നാണ് ജനവിധി തേടുന്നത്.

പാലാ: പഞ്ചായത്തംഗമെന്ന നിലയിലും ബിജെപി ഭാരവാഹിയെന്ന നിലയിലും 2010 മുതല്‍ ഭരണ രംഗത്തും പൊതുപ്രവര്‍ത്തന രംഗത്തും ജനക്ഷേമം മുന്‍നിര്‍ത്തിയുള്ള പ്രവര്‍ത്തനമാണ് രണ്‍ജിത്തിനെ ജനപ്രിയനാക്കിയത്. മുത്തോലി പഞ്ചായത്തിലെ 6 മുതല്‍ 12 വരെ വാര്‍ഡുകള്‍ ഉള്‍പ്പെടുന്നതാണ് മുത്തോലി ഡിവിഷന്‍.

ബിജെപിക്ക് കേവലഭൂരിപക്ഷം ഇല്ലാതിരുന്നിട്ടും പ്രബലരായ മറ്റ് രണ്ട് മുന്നണികളെയും വിശ്വാസത്തിലെടുത്തും ഒപ്പം നിര്‍ത്തിയുമാണ് മുത്തോലി ഗ്രാമപഞ്ചായത്ത് ഭണസമിതിക്ക് നേതൃത്വം നല്‍കിയത്. കഴിഞ്ഞ പഞ്ചായത്ത് തെരഞ്ഞെടുപ്പ് പ്രകടനപത്രികയില്‍ പറഞ്ഞ എല്ലാ കാര്യങ്ങളും പൂര്‍ത്തിയാക്കി പഞ്ചായത്ത് ഫണ്ടില്‍ 4.6 കോടി രൂപ ബാക്കി വെച്ചാണ് രണ്‍ജിത്ത് നേതൃത്വം നല്‍കിയ ബിജെപി ഭരണസമിതി കാലാവധി പൂര്‍ത്തിയാക്കിയത്.

ആരോഗ്യം,വിദ്യാഭ്യാസം, കുടിവെള്ളം,ഭവന-ശുചിത്വ പദ്ധതികള്‍ മാതൃകാപരമായി നടപ്പാക്കി. സൗജന്യ ആംബുലന്‍സ് സര്‍വീസ്, വിദ്യാലയങ്ങളില്‍ വായനശാല, അംബേദ്ക്കര്‍ പ്രതിമ സ്ഥാപിക്കല്‍ 60 വയസ് കഴിഞ്ഞ 1500 പേരെ ഉള്‍പ്പെടുത്തി രണ്ട് തവണയായി നടത്തിയ ഉല്ലാസയാത്ര എന്നിവ സംസ്ഥാത്ത് പഞ്ചായത്തുകളുടെ ചരിത്രത്തില്‍ ആദ്യമായി നടപ്പാക്കിയ പദ്ധതികളാണ്. യുഡിഎഫിലെ കോണ്‍ഗ്രസ് പ്രതിനിധി ഹരിദാസ് അടമത്ര, എല്‍ഡിഎഫിലെ കേരളകോണ്‍ഗ്രസ് എം പ്രതിനിധി ഷാജി ജോസഫ് വില്ലന്‍ കല്ലേല്‍ എന്നിവരാണ് എതിര്‍ സ്ഥാനാര്‍ഥികള്‍.