കൊല്‍ക്കത്ത: രാജ്ഭവന്റെ പേര് ലോക്ഭവന്‍ എന്നാക്കിയത് ഭരണഘടനാ വിരുദ്ധമാണെന്നും ഗവര്‍ണര്‍ തന്റെ തീരുമാനം പിന്‍വലിക്കണമെന്നുമുള്ള വിമര്‍ശനങ്ങള്‍ കഥയറിയാതെയുള്ള ആട്ടംകാണലാണെന്ന് ബംഗാള്‍ ഗവര്‍ണര്‍ ഡോ സി.വി ആനന്ദബോസ്.
ഗവര്‍ണറുടെ ഓഫീസിനും വസതിക്കും എന്ത് പേരിടണമെന്ന് തീരുമാനിക്കുന്നത് മുഖ്യമന്ത്രിയോ സംസ്ഥാന സര്‍ക്കാരോ അല്ല. കേന്ദ്രസര്‍ക്കാരും ഗവര്‍ണറുമാണ്. തന്റെ അഭ്യര്‍ത്ഥനപ്രകാരം രാഷ്‌ട്രപതി ദ്രൗപതി മുര്‍മു 2023 മാര്‍ച്ച് 27 ന് രാജ്ഭവന്റെ പേര് ‘ജനരാജ്ഭവന്‍’ എന്ന് പുനര്‍നാമകരണം ചെയ്ത് താക്കോല്‍ മുഖ്യമന്ത്രിക്ക് കൈമാറിയതും അഭിമാനത്തോടെ അതവര്‍ സ്വീകരിച്ചതും വിമര്‍ശകര്‍ മറന്നുപോകുന്നു.
രാജ്യത്താദ്യമായി രാജ്ഭവന്റെ പേരുമാറ്റണമെന്ന ആശയം ആവിഷ്‌കരിച്ചതും നടപ്പാക്കിയതും ബംഗാളിലാണെന്ന കാര്യത്തില്‍ നാം അഭിമാനിക്കുകയാണ് വേണ്ടത്. പേരുമാറ്റം മാത്രമല്ല, രാജ്യത്തിന് മാതൃകയായ അനേകം ജനകീയ പരിപാടികള്‍ക്കും ബംഗാളിലെ ‘ജനരാജ്ഭവന്‍’ ആണ് മുന്‍കൈയെടുത്തത് – വിമര്‍ശനങ്ങള്‍ക്ക് മറുപടിയായി ഗവര്‍ണര്‍ പറഞ്ഞു.