അയോദ്ധ്യ: ‘എല്ലാവരെയും ഉൾക്കൊള്ളുന്ന ഐക്യത്തിന്റെ സന്ദേശം ലോകത്തിന് പകർന്നു നൽകിയ നാടാണ് ഭാരതം. ആ അനശ്വര സംസ്കാരത്തിന്റെ നിത്യപ്രകാശമുള്ള പ്രതീകമാണ് ശ്രീരാമനെന്നും മാതാ അമൃതാനന്ദമയീ ദേവി ചുണ്ടിക്കാട്ടി. അയോദ്ധ്യ രാമജന്മഭൂമിയിൽ ശ്രീരാമനവമിയുടെ ഭാഗമായി രാഷ്ട്രപതി ദ്രൗപദി മുർമുവും മാതാ അമൃതാനന്ദമയീ ദേവിയും യുപി മുഖ്യമന്ത്രി യോഗി ആദിത്യനാഥും ദർശനം നടത്തുകയും പൂജകൾ നടത്തുകയും ചെയ്തു. ഇതിനോടനുബന്ധിച്ച് നടന്ന യോഗത്തിൽ സന്ദേശം നൽകുകയായിരുന്നു അമ്മ.
ശ്രീരാമന്റെ ജീവിതവും സ്മരണയും എപ്പോഴും മനുഷ്യഹൃദയങ്ങളെ വിശുദ്ധീകരിക്കട്ടെ. മൂല്യങ്ങൾ ക്രമേണ ക്ഷയിച്ചുകൊണ്ടിരിക്കുന്ന ഈ കാലഘട്ടത്തിൽ, രാമായണവും ശ്രീരാമന്റെ ജീവിതവും നമ്മിൽ ധർമ്മബോധം, ആന്തരിക ശക്തി, നമ്മുടെ പ്രവൃത്തികളിൽ നിസ്വാർത്ഥത എന്നിവ ഉണർത്തുന്നു,’ അയോധ്യയിൽ ശ്രീരാമ യന്ത്രത്തിന്റെ പവിത്രമായ സമർപ്പണത്തെക്കുറിച്ചുള്ള സന്ദേശത്തിൽ അമ്മ പറഞ്ഞു.
അയോദ്ധ്യയിൽ രാമജന്മസ്ഥാനിൽ ഇത്ര പവിത്രവും ഭവ്യവുമായ ക്ഷേത്ര നിർമ്മാണത്തിനുവേണ്ട സാഹചര്യമൊരുക്കാൻ യത്നിച്ച, അതിന് ജീവൻ സമർപ്പിച്ച, ഏറെ സഹനങ്ങൾ അനുഭവിച്ച വിശ്വാസികൾക്കും ഭക്തർക്കും പ്രവർത്തകർക്കും അമ്മ പ്രണാമമർപ്പിച്ചു.