ന്യൂഡൽഹി ; ഇന്ത്യയും ഫ്രാൻസും തമ്മിലുള്ള പ്രതിരോധ ചർച്ചകൾ ശക്തമാകുന്നതിനിടെ റഫാൽ യുദ്ധവിമാനങ്ങൾക്കായി ഇന്ത്യൻ എഞ്ചിൻ ലൈൻ സ്ഥാപിക്കുമെന്ന് ഫ്രഞ്ച് എയ്റോസ്പേസ് കമ്പനിയായ സഫ്രാൻ . ഡസ്സോൾട്ട് ഏവിയേഷന്റെ റാഫേൽ യുദ്ധവിമാനങ്ങളിൽ ഉപയോഗിക്കുന്ന M88 എഞ്ചിനുകൾ നിർമ്മിക്കുന്ന ഫ്രഞ്ച് എയ്റോസ്പേസ്, പ്രതിരോധ കമ്പനിയാണ് സഫ്രാൻ.
ഇന്ത്യയിൽ ഒരു എഞ്ചിൻ അസംബ്ലി ലൈൻ സ്ഥാപിക്കാനുള്ള കമ്പനിയുടെ വാഗ്ദാനം ഇന്ത്യയെ സംബന്ധിച്ച് നിർണ്ണായകമാണ് . പ്രാദേശിക ഉൽപ്പാദനത്തിനും സാങ്കേതികവിദ്യ കൈമാറ്റത്തിനുമുള്ള ഇന്ത്യയുടെ പ്രതിബദ്ധതയെ ഇത് പിന്തുണയ്ക്കുന്നു.
പതിറ്റാണ്ടുകളായി ഹെലികോപ്റ്റർ എഞ്ചിനുകളും മറ്റ് നിർണായക എയ്റോസ്പേസ് ഘടകങ്ങളും സഫ്രാൻ വിതരണം ചെയ്തിട്ടുണ്ട്. എഞ്ചിൻ ഭാഗങ്ങൾ നിർമ്മിക്കുന്നതിനും നൂതന എയ്റോസ്പേസ് പരിഹാരങ്ങളിൽ സഹകരിക്കുന്നതിനും ഇന്ത്യൻ കമ്പനികളുമായി സഫ്രാന് കരാറുകളുമുണ്ട്.
ചില വ്യവസ്ഥകൾ പാലിക്കുകയാണെങ്കിൽ, ഡിആർഡിഒയുമായി സഹകരിച്ച് അടുത്ത തലമുറ ഫൈറ്റർ ജെറ്റ് എഞ്ചിനുകൾക്കായി പൂർണ്ണ സാങ്കേതികവിദ്യാ കൈമാറ്റത്തിനും സഫ്രാൻ തയ്യാറാണെന്ന് വ്യക്തമാക്കി കഴിഞ്ഞു.2030 ഓടെ ഇന്ത്യയിൽ വരുമാനം മൂന്നിരട്ടിയാക്കുക, ഇവിടെ സോഴ്സിംഗും ഉൽപ്പാദനവും വർദ്ധിപ്പിക്കുക എന്ന പദ്ധതിയുമായി സഫ്രാൻ ചേർന്ന് പ്രവർത്തിക്കും.ഇന്ത്യയിൽ ഒരു എഞ്ചിൻ അസംബ്ലി ലൈൻ സ്ഥാപിക്കുന്നത് വിവിധ എയ്റോസ്പേസ് പ്രോഗ്രാമുകൾക്കുള്ള വിതരണ ശൃംഖലകൾ മെച്ചപ്പെടുത്തും.
എയ്റോസ്പേസ് ഘടകങ്ങളുടെയും സേവനങ്ങളുടെയും കയറ്റുമതി വളരുകയും ചെയ്യും.ഉയർന്ന നൈപുണ്യമുള്ള നിർമ്മാണം, എഞ്ചിനീയറിംഗ്, പരീക്ഷണ റോളുകൾ എന്നിവിടങ്ങളിൽ തൊഴിലവസരങ്ങൾ സൃഷ്ടിക്കപ്പെടാം. ആഗോള എയ്റോസ്പേസ് മൂല്യ ശൃംഖലകളിൽ പ്രാദേശിക വിതരണക്കാർക്കും പങ്ക് ചേരാം.ടാറ്റ അഡ്വാൻസ്ഡ് സിസ്റ്റംസ്, ഭാരത് ഇലക്ട്രോണിക്സ് ലിമിറ്റഡ് തുടങ്ങിയ കമ്പനികൾക്ക് വിപുലീകൃത വ്യാവസായിക സഹകരണത്തിൽ നിന്ന് പ്രയോജനം ലഭിച്ചേക്കാം. മൊത്തത്തിൽ, ഏഷ്യ-പസഫിക് മേഖലയിലെ ഒരു പ്രധാന എയ്റോസ്പേസ് നിർമ്മാണ കേന്ദ്രമായി ഇത് ഇന്ത്യയെ മാറ്റും.