കുതിരാന്‍ (തൃശൂര്‍): ദേശീയപാതയില്‍ വഴുക്കുംപാറ മേല്‍പാതയില്‍ ബൈക്കില്‍ ലോറിയിടിച്ച് ബൈക്ക് യാത്രക്കാരായ യുവതിയും യുവാവും മരിച്ചു. തൃശൂര്‍ ഭാഗത്തേക്കുളള റോഡില്‍ കുതിരാന്‍ തുരങ്കം പിന്നിട്ടയുടന്‍ ഞായറാഴ്ച രാത്രി 9 നായിരുന്നു അപകടം. റോഡിലേക്കു തെറിച്ചു വീണ ഹെല്‍മറ്റ് എടുക്കുന്നതിനായി പെട്ടെന്നു നിര്‍ത്തിയ ബൈക്കിനു പിന്നിലായി പാലുമായി പോയ ലോറി ഇടിക്കുകയായിരുന്നു.

ഇടിയുടെ ആഘാതത്തില്‍ യാത്രക്കാരും ബൈക്കും ലോറിക്കടയില്‍ പെട്ടു. എറണാകുളം കലൂര്‍ എംപയര്‍ അപ്പാര്‍ട്‌മെന്റ് നെടുംപുറയ്ക്കല്‍ മാസിന്‍ അബ്ബാസ് ( 36), ആലപ്പുഴ നൂറനാട് തച്ചന്റെ കിഴക്കേതില്‍ വിദ്യ വിജയന്‍ ( 38) എന്നിവരാണ് മരിച്ചതെന്നു പോലീസ് പറഞ്ഞു. ചക്രത്തിനടിയില്‍ കുടുങ്ങിയ ഇരുവരുടെയും ശരീരത്തിലൂടെ ലോറിയുടെ ചക്രങ്ങള്‍ കയറിയിറങ്ങി. ഏറെ നേരത്തിനു ശേഷം ക്രെയിന്‍ ഉപയോഗിച്ച് ലോറി മാറ്റിയാണ് ബൈക്ക് പുറത്തെടുത്തത്.