ലണ്ടൻ : വിദേശത്ത് ഇന്ത്യക്കാർക്കെതിരായ ആക്രമണങ്ങൾ തുടർച്ചയായി വർദ്ധിച്ചുകൊണ്ടിരിക്കുകയാണ്. കാനഡയിലും അയർലൻഡിലും സമീപകാലത്ത് ഇത്തരം നിരവധി സംഭവങ്ങൾ കണ്ടിട്ടുണ്ട്. എന്നാൽ ഇംഗ്ലണ്ടിന്റെ തലസ്ഥാനമായ ലണ്ടനിൽ നടന്നത് വളരെ ഭയാനകമാണ്.

ഇവിടെ ഒരു ഇന്ത്യൻ റെസ്റ്റോറന്റിന് തീയിട്ടു. ഈ ആക്രമണത്തിൽ കുറഞ്ഞത് 5 പേർക്ക് പരിക്കേറ്റു. റെസ്റ്റോറന്റിൽ വലിയ ജനക്കൂട്ടം ഉണ്ടായിരുന്നപ്പോഴാണ് ആക്രമണം നടത്തിയത്. ഗാന്റ്സ് ഹില്ലിലെ വുഡ്ഫോർഡ് അവന്യൂവിൽ സ്ഥിതി ചെയ്യുന്ന ‘ഇന്ത്യൻ അരോമ’ എന്ന ഇന്ത്യൻ റെസ്റ്റോറന്റിന് തീയിട്ട സംഭവത്തിൽ 15 വയസ്സുള്ള ഒരു കൗമാരക്കാരൻ ഉൾപ്പെടെ രണ്ട് പേരെ പോലീസ് അറസ്റ്റ് ചെയ്തു.

സിസിടിവി ദൃശ്യങ്ങളിൽ ചിലർ റെസ്റ്റോറന്റിലേക്ക് കയറി പെട്രോൾ പോലുള്ള വസ്തു തറയിലേക്ക് എറിയുന്നതും ഇതിനുശേഷം തീ പടർന്നതായും കാണാം. തീപിടിത്തമുണ്ടായ ഉടൻ റെസ്റ്റോറന്റിലുണ്ടായിരുന്ന ആളുകൾ പരിഭ്രാന്തിയിലായി.
സംഭവത്തെക്കുറിച്ചുള്ള മാധ്യമ റിപ്പോർട്ടുകൾ പ്രകാരം ഈ ആക്രമണത്തിൽ കുറഞ്ഞത് മൂന്ന് സ്ത്രീകൾക്കും രണ്ട് പുരുഷന്മാർക്കും പൊള്ളലേറ്റിട്ടുണ്ട്. ആക്രമണം നടന്ന സമയത്ത് ഇവരെല്ലാം റസ്റ്റോറന്റിൽ ഭക്ഷണം കഴിക്കുകയായിരുന്നു.

തീപിടുത്തത്തിൽ പൊള്ളലേറ്റവരെ ചികിത്സയ്‌ക്കായി ആശുപത്രിയിൽ പ്രവേശിപ്പിച്ചു. ഒരു പുരുഷന്റെയും ഒരു സ്ത്രീയുടെയും നില ഗുരുതരമാണെന്ന് പോലീസ് പറഞ്ഞു. തീപിടുത്തത്തിന് ശേഷം ഉദ്യോഗസ്ഥർ എത്തുന്നതിന് മുമ്പ് രണ്ട് പ്രതികൾ കൂടി സ്ഥലം വിട്ടതായി പോലീസ് പറഞ്ഞു. തീപിടുത്തത്തിന് ശേഷം ഒരു സംഘം അഗ്നിശമന സേന സ്ഥലത്തെത്തി ഏകദേശം 90 മിനിറ്റ് കഠിനാധ്വാനത്തിന് ശേഷം തീ നിയന്ത്രണവിധേയമാക്കി.

അതേ സമയം റസ്റ്റോറന്റിന് തീയിട്ട സംഭവത്തിൽ ഇന്ത്യൻ സമൂഹം ആശങ്കയിലും ഞെട്ടലിലും ആണ്. നിലവിൽ റസ്റ്റോറന്റിന് തീയിടാനുള്ള കാരണം ഇതുവരെ അറിവായിട്ടില്ല.