നെയ്യാറ്റിന്‍കര: കഞ്ചാവും, എംഡിഎംഎയും മയക്കുമരുന്ന് മാഫിയ പുതിയ തന്ത്രങ്ങള്‍ ആവിഷ്‌കരിച്ചതായി സൂചന. ജാമ്യം കിട്ടുന്നവിധം കുറഞ്ഞ അളവില്‍ എംഡിയും കഞ്ചാവും പ്രായം കുറഞ്ഞ പെണ്‍കുട്ടികളുടെ കൈവശം കൊടുത്തുവിട്ടു ട്രയല്‍ റണ്‍ തുടങ്ങിയതായാണ് വിവരം.
സ്‌കൂളും കോളജും തുറന്നതോടെ ഹിന്ദിയും തമിഴും മാത്രം സംസാരിക്കുന്ന പ്രായം കുറഞ്ഞ രണ്ടോ മൂന്നോ സംഘങ്ങളുള്ള പെണ്‍കുട്ടികളുടെ കൈവശം കുറഞ്ഞ അളവില്‍ ലഹരികൊടുത്തുവിടകയാണ് പുതിയ രീതിയായി അവലംബിക്കുന്നത്. ഇവ കൊടുത്തു വിടുന്നവര്‍ തന്നെ എക്‌സൈസിനും പോലീസിനും രഹസ്യ വിവരം കൈമാറും. പോലീസിന്റെയും എക്‌സൈസിന്റെയും ശ്രദ്ധ ഇതിലേക്ക് കേന്ദ്രീകരിക്കുന്നതിലൂടെ സുരക്ഷിതപാതയൊരുക്കി യഥാര്‍ത്ഥ ലഹരി കടത്തുകാര്‍ വലിയതോതില്‍ മയക്കു മരുന്നുകള്‍ കടത്തുന്നതായും സൂചന. അമരവിളയില്‍ തിങ്കളഴ്ച രാവിലെ പെണ്‍കുട്ടികള്‍ പിടിയിലായത് ഇതിന്റെ ഭാഗമാണെന്നാണ് വിലയിരുത്തല്‍.
19 നും 21 നും ഇടയില്‍ പ്രായമുള്ള മൂന്ന് പെണ്‍കുട്ടികളില്‍ നിന്ന് 10 ഗ്രാം കഞ്ചാവാണ് അമരവിള ചെക്ക്‌പോസ്റ്റിലെ എക്‌സൈസ് ഉദ്യോഗസ്ഥര്‍ പിടിച്ചെടുത്തത്. ബംഗളുരുവില്‍ നിന്നും തിരുവനന്തപുരത്തേക്ക് വരികയായിരുന്ന ആഡംബര ബസിലാണ് ഇവര്‍ വന്നത്. ബസിലെ പരിശോധനയിലാണ് എംഡിഎംഎ കണ്ടെത്തിയത്. കേസെടുത്ത് കോടതിയില്‍ എത്തുമ്പോള്‍ ഇവര്‍ക്ക് ജാമ്യം ലഭിക്കുവിധമുള്ള അളവിലേ ലഹരിമരുന്ന് ഇവരുടെ കൈവശം ഉണ്ടായിരുന്നുള്ളു.
എക്‌സൈസ് വിഭാഗവും പോലീസും ഇത് സൂക്ഷ്മതയോടെ വീക്ഷിച്ചു വരികയാണ്. ദിവസങ്ങള്‍ക്കു മുന്‍പ് സ്വാമിമാരുടെ വേഷത്തില്‍ എത്തിയവരുടെ കൈയില്‍ നിന്നും എക്‌സൈസ് കഞ്ചാവ് പിടിച്ചെടുത്തിരുന്നു.