വരുമാനമുണ്ടെങ്കിലും വിവാഹബന്ധം വേര്‍പിരിഞ്ഞ് ഭര്‍ത്താവുമായി അകന്ന് ജീവിക്കുന്ന ഭാര്യക്ക് ജീവനാംശം നിഷേധിക്കാനാവില്ലെന്ന് ഹൈകോടതി. ഭര്‍ത്താവുനായി ജീവിച്ചപ്പോഴുള്ള ജീവിതനിലവാരം തുടരാന്‍ ഭാര്യക്ക് അര്‍ഹതയുണ്ടെന്ന് വിലയിരുത്തിയാണ് ഉത്തരവ്. ഹൈക്കോടതി ജസ്റ്റിസ് കൗസര്‍ എടപ്പഗത്തിലാണ് കേസില്‍ വിധി പറഞ്ഞത്.
ഭര്‍ത്താവില്‍നിന്നുള്ള ജീവനാംശം മാസവരുമാനമുണ്ടെന്ന് ചൂണ്ടിക്കാട്ടി ഭാര്യക്ക് നിഷേധിച്ച പത്തനംതിട്ട കുടുംബ കോടതി ഉത്തരവ് റദ്ദാക്കി. അതോടൊപ്പം കോടതി ജീവനാംശം തീരുമാനിക്കാന്‍ നിര്‍ദേശിച്ച് കേസ് കുടുംബകോടതിയിലേക്ക് മടക്കുകയും ചെയ്തു. ഭര്‍ത്താവിന് ഒമ്പതുലക്ഷം മാസവരുമാനമുണ്ട്, എല്‍.ഐ.സി പെന്‍ഷന്‍ ഫണ്ടില്‍ വലിയ നിക്ഷേപവുമുണ്ടെന്ന് ഭാര്യ ചൂണ്ടിക്കാട്ടി. മകള്‍ക്കും തനിക്കുമായി 45,000 രൂപയാണ് മാസം ജീവനാംശമായി ആവശ്യപ്പെട്ടിരുന്നത്. എന്നാല്‍, ഭാര്യ ജോലി ചെയ്യുന്നുണ്ടെന്നും മകള്‍ക്ക് പ്രായപൂര്‍ത്തിയായതിനാല്‍ ജീവനാംശത്തിന് അര്‍ഹതയില്ലെന്നുമായിരുന്നു ഭര്‍ത്താവിന്റെ വാദം.
എന്നാല്‍, ഭാര്യയുടെ താല്‍ക്കാലിക ജോലിക്ക് തുച്ഛമായ വരുമാനമാണ് ലഭിക്കുന്നതെന്ന് വിലയിരുത്തിയ കോടതി കുറഞ്ഞ വരുമാനം ജീവിക്കാന്‍ മതിയാവില്ലെന്ന് പറയുന്ന പക്ഷം ഭര്‍ത്താവില്‍നിന്നുള്ള ജീവനാംശത്തിനുള്ള അവകാശം ഭാര്യക്ക് നിഷേധിക്കാനാവില്ലെന്ന് വ്യക്തമാക്കി. തന്നെ ആശ്രയിക്കുന്ന കുട്ടി പ്രായപൂര്‍ത്തിയായ ആളാണ് എന്നത് കുട്ടിയുടെ ആവശ്യങ്ങള്‍ക്കായി ഭര്‍ത്താവില്‍നിന്ന് ജീവനാംശം കിട്ടാന്‍ ഭാര്യക്ക് തടസ്സമല്ലെന്നും കോടതി പറഞ്ഞു.
കുടുംബം പോറ്റാന്‍ കഴിയില്ലെന്നും നിയമപരമായ ചുമതലകള്‍ നിറവേറ്റാനാവില്ലെന്നും തെളിയിക്കേണ്ടത് കേസില്‍ ഭര്‍ത്താവിന്റെ ബാധ്യതയാണെന്നും ഹിന്ദു അഡോപ്ഷന്‍സ് ആന്‍ഡ് മെയിന്റനന്‍സ് നിയമപ്രകാരം വിവാഹം കഴിക്കുന്നതുവരെ മകള്‍ക്ക് ജീവനാംശം നല്‍കാന്‍ പിതാവിന് ഉത്തരവാദിത്തമുണ്ടെന്ന് കോടതി വിലയിരുത്തി. എന്നാല്‍, ഇക്കാര്യം കുടുംബ കോടതിയില്‍ ഉന്നയിക്കാമെന്നും കോടതി വ്യക്തമാക്കി.