തിരുവനന്തപുരം: ഏറെ വിമര്ശനങ്ങള് ഉയര്ന്നിട്ടും കൂട്ടാക്കാതെ വിഘടന വാദത്തിന് തിരികൊളുത്തി നേറ്റിവിറ്റി കാര്ഡുമായി സംസ്ഥാന സര്ക്കാര്. നേറ്റിവിറ്റി കാര്ഡ് ബില്ലിന് മന്ത്രിസഭാ യോഗം അംഗീകാരം നല്കി. നവകേരള സര്വെയ്ക്ക് ഹൈക്കോടതിയില് നിന്ന് തിരിച്ചടി കിട്ടിയിട്ടും പഠിക്കാതെയാണ് കേരള നേറ്റിവിറ്റി കാര്ഡുമായി സര്ക്കാര് മൂന്നോട്ട് നീങ്ങുന്നത്. വ്യാജമായി കാര്ഡുകള് നിര്മിക്കുന്നതിനും കൈക്കൂലിക്കും ഇടവരുത്തുന്നതാണ് സര്ക്കാര് നീക്കം.
ഒരാള് കേരളീയനാണ് എന്ന് സാക്ഷ്യപ്പെടുത്തുന്നതിന് സംസ്ഥാന സര്ക്കാര് നിലവില് നല്കിവരുന്ന നേറ്റിവിറ്റി സര്ട്ടിഫിക്കറ്റ് മാതൃകയുടെ അടിസ്ഥാനത്തിലാണ് നേറ്റിവിറ്റി കാര്ഡ് നല്കുക. കേരള സര്ക്കാര് നല്കുന്ന വിവിധ സേവനങ്ങള്ക്കും സാമൂഹ്യ ആവശ്യങ്ങള്ക്കും കാര്ഡ് ആധികാരിക രേഖയാക്കും. ഭാരത പൗരന് എന്ന് വ്യക്തമാക്കുന്ന ആധാര് കാര്ഡ് നിലനില്ക്കെയാണ് നേറ്റിവിറ്റി കാര്ഡിനുള്ള സര്ക്കാര് നീക്കം. വിദ്യാഭ്യാസ ആവശ്യത്തിനും മറ്റും നേറ്റിവിറ്റി കാര്ഡ് സര്ക്കാര് രേഖയാക്കും. എന്നാല് ദേശീയ അടിസ്ഥാനത്തില് കേരള നേറ്റിവിറ്റി കാര്ഡ് അംഗീകരിക്കണമെന്നില്ല. ഇത് കേരളത്തിലെ വിദ്യാര്ത്ഥികളെ പെരുവഴിയിലാക്കും. ഇതോടെ സമൂഹത്തെ രണ്ട് തട്ടിലാക്കും.
നേറ്റീവ് എന്നാല് കേരളത്തില് ജനിച്ച് വിദേശ പൗരത്വം സ്വീകരിക്കാത്തവരോ തങ്ങളുടെ പൂര്വ്വികരില് ഒരാള് കേരളത്തില് ജനിച്ചവരും വിദേശ പൗരത്വം സ്വീകരിക്കാത്തവരും ആയിരിക്കണം. വിദേശ പൗരത്വം സ്വീകരിച്ചവര്ക്ക് നേറ്റിവിറ്റി കാര്ഡിന് അര്ഹതയുണ്ടായിരിക്കില്ല. നേറ്റിവിറ്റി കാര്ഡ് ലഭിച്ച ശേഷം വിദേശ പൗരത്വം സ്വീകരിക്കുന്നപക്ഷം നേറ്റിവിറ്റി കാര്ഡ് അസാധുവാകും. തൊഴില് സംബന്ധമായോ ജീവനോപാധി സംബന്ധമായ മറ്റു കാരണങ്ങളാലോ മാതാപിതാക്കളോ പൂര്വികരോ കേരളത്തിന് പുറത്തായിരിക്കുമ്പോള് അവിടെ ജനിച്ചവരേയും (വിദേശ പൗരത്വം ലഭിച്ചിട്ടില്ലാത്തവരെ) നേറ്റീവ് ആയി കണക്കാക്കും.
കാര്ഡ് അനുവദിക്കുന്നതിന് അധികാരപ്പെട്ട ഉദ്യോഗസ്ഥന് തഹസില്ദാറാണ്. കാര്ഡ് ആവശ്യമുള്ളവര് ബന്ധപ്പെട്ട ഉദ്യോഗസ്ഥര് മുമ്പാകെ നിശ്ചിതഫോറത്തില് രേഖകളും ഫീസും സഹിതം അപേക്ഷ സമര്പ്പിക്കണം. ജില്ലാ കളക്ടര്ക്ക് കക്ഷിയുടെ അപേക്ഷ പ്രകാരം റവന്യൂ ഡിവിഷണല് ഓഫീസര് കൈക്കൊണ്ട തീരുമാനമോ, പാസാക്കിയ ഉത്തരവോ പുനഃപരിശോധിക്കാവുന്നതും റദ്ദുചെയ്യുകയോ മാറ്റം വരുത്തുകയോ ചെയ്യാവുന്നതുമാണ്.