ന്യൂദല്ഹി : ശബരിമല യുവതീപ്രവേശന വിഷയത്തിലെ പുനഃപരിശോധന ഹര്ജികള് സുപ്രീംകോടതി തിങ്കളാഴ്ച പരിഗണിക്കും. ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാകും ഹര്ജികള് പരിഗണിക്കുക. ഒന്പതംഗ ഭരണഘടനാ ബെഞ്ച് രൂപീകരിക്കുന്നതില് തീരുമാനമുണ്ടാകാനാണ് സാധ്യത.
ആറ് വര്ഷത്തിന് ശേഷമാണ് ശബരിമല യുവതി പ്രവേശനമായി ബന്ധപ്പെട്ട ഹര്ജികള് സുപ്രീംകോടതിയുടെ പരിഗണനയ്ക്ക് എത്തുന്നത്. യുവതീ പ്രവേശനം അനുവദിച്ചുള്ള അഞ്ചംഗ ഭരണഘടനാ ബെഞ്ച് വിധിക്കെതിരെ പുനഃപരിശോധനയടക്കം 67 ഹര്ജികളാണ് നിലവില് സുപ്രീംകോടതിയില് ഉള്ളത്.
2019-ല് കേസ് ഒമ്പതംഗ ബെഞ്ച് പരിഗണിച്ചപ്പോള് ഉണ്ടായിരുന്ന ജഡ്ജിമാരില് അവശേഷിക്കുന്ന ഏകയാളാണ് നിലവിലെ ചീഫ് ജസ്റ്റിസ് സൂര്യകാന്ത്.ഹര്ജികള് പരിഗണിക്കുമ്പോള് സംസ്ഥാന സര്ക്കാരിന് നിലപാട് സുപ്രീംകോടതിയില് അറിയിക്കേണ്ടി വരും.യുവതീ പ്രവേശനത്തിന് അനുകൂല നിലപാടാണ് സംസ്ഥാന സര്ക്കാരിന്റേത്. അത് മാറ്റുമോ എന്നും അറിയേണ്ടതുണ്ട്.