സംസ്ഥാനത്ത് ഒരാള്‍ക്ക് കൂടി അമീബിക് മസ്തിഷ്‌ക ജ്വരം സ്ഥിരീകരിച്ചു. മലപ്പുറം വണ്ടൂര്‍ സ്വദേശിനിയായ 56 കാരിക്കാണ് രോഗം സ്ഥിരീകരിച്ചത്. ഈ മാസം നാലിനാണ് ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. ഇവരുടെ ആരോഗ്യനില വളരെ മോശമാണെന്നും മെഡിക്കല്‍ കോളജ് അധികൃതര്‍ അറിയിച്ചു. നിലവില്‍ ഇവര്‍ ഐസിയുവില്‍ ചികിത്സയിലാണ്.
നിലവില്‍ 11 പേരാണ് വിവിധ ജില്ലകളില്‍ നിന്നും അമീബിക് മസ്തിഷ്‌ക ജ്വരം ബാധിച്ച് കോഴിക്കോട് മെഡിക്കല്‍ കോളജില്‍ ചികിത്സയില്‍ തുടരുന്നത്. ഇന്നലെയാണ് വയനാട് മാനന്തവാടി സ്വദേശി രതീഷ് (45) രോഗം ബാധിച്ച് മരിച്ചത്. രണ്ടാഴ്ചയായി ഐസിയൂവിലായിരുന്ന രതീഷ് അതീവ ഗുരുതരാവസ്ഥയിലായിരുന്നു.