ആലപ്പുഴ: സംസ്ഥാനത്ത് 23 പൊതുമേഖല സ്ഥാപനങ്ങള്‍ നഷ്ടത്തിലാണെന്ന് വ്യവസായ മന്ത്രി പി. രാജീവ് പറഞ്ഞു. ഇവയുടെ നഷ്ടം കുറഞ്ഞുവരുന്നുണ്ട്. സര്‍ക്കാര്‍ വകുപ്പുകള്‍ പോലെ പ്രവര്‍ത്തിക്കേണ്ടതല്ല പൊതുമേഖലാ സ്ഥാപനങ്ങള്‍. കമ്പനി നിയമമനുസരിച്ച് ലാഭമുണ്ടാക്കി പ്രവര്‍ത്തിക്കേണ്ടതാണെന്ന് അദ്‌ദേഹം ചൂണ്ടിക്കാട്ടി . മറ്റ് 24 പൊതുമേഖല സ്ഥാപനങ്ങള്‍ ലാഭമുണ്ടാക്കുന്നുണ്ട്. ചേര്‍ത്തല ഓട്ടോകാസ്റ്റിനെ ലാഭത്തിലാക്കാനും സര്‍ക്കാര്‍ ശ്രമിച്ചുവരികയാണ്. പൊതുമേഖലയെ സംരക്ഷിക്കാന്‍ മാത്രമല്ല അതിന് അകത്തുതന്നെ പുതിയ സംരംഭങ്ങള്‍ക്കും ശ്രമിക്കുന്നുണ്ട്. ഈ വര്‍ഷം കേരളത്തില്‍ പൊതുമേഖല സ്ഥാപനങ്ങളുടെ വിറ്റ് വരവ് 5000 കോടിക്ക് മുകളിലായിട്ടുണ്ട്. ഇത് നേട്ടമാണെന്നും സ്റ്റീല്‍ ഇന്‍ഡസ്ട്രിയല്‍സ് കേരള ലിമിറ്റഡിന്റെ (സില്‍ക്ക്) സുവര്‍ണ്ണ ജൂബിലി ആഘോഷത്തിന്റെ ഉദ്ഘാടനം ചേര്‍ത്തലയില്‍ നിര്‍വഹിച്ചു സംസാരിക്കവെ മന്ത്രി പറഞ്ഞു.