അഖിൽ മാരാർക്കും റോബിൻ രാധാകൃഷ്ണനും പിന്നാലെ ബിഗ്ബോസ് വിജയി അനുമോൾക്കും താല്പര്യം ബിജെപിയോട്. പ്രധാനമന്ത്രി നരേന്ദ്രമോദിയോട് ഏറെ ആരാധനയും, സ്നേഹവും തനിക്കുണ്ടെന്ന് അനുമോള്. നരേന്ദ്രമോദിയെ നേരിട്ട് കാണണമെന്ന് വലിയ ആഗ്രഹമുണ്ട്. അതിനൊരു അവസരത്തിനായി കാത്തിരിക്കുകയാണ്. ഉടനെ അത് സാധിക്കുമെന്ന് പ്രതീക്ഷിക്കുന്നുവെന്നും അനുമോള് പറഞ്ഞു. പ്രധാനമന്ത്രിയെ കൂടാതെ സുരേഷ് ഗോപി, കൃഷ്ണകുമാർ അടക്കമുള്ളവരെ തനിക്ക് ഇഷ്ടമാണെന്ന് അനുമോൾ വ്യക്തമാക്കി.
നല്ലത് ചെയ്യുന്നവരെ ബഹുമാനിക്കുകയാണ് ചെയ്യുന്നതെന്നും അനുമോൾ പറഞ്ഞു. ഓൺലൈൻ മാധ്യമങ്ങളുടെ ചോദ്യത്തിന് മറുപടി പറയുകയായിരുന്നു അനു. “ബിജെപിയിൽ എനിക്ക് ഒരുപാട് പേരെ ഇഷ്ടമാണ്. സുരേഷ് ഗോപി സാറിനെ ഇഷ്ടമാണ്. നരേന്ദ്ര മോദി സാറിനെ എനിക്ക് ഇഷ്ടമാണ്. അദ്ദേഹത്തെ കാണണമെന്നുണ്ട്. അന്ന് തിരുവനന്തപുരത്ത് വന്നപ്പോള് കാണാന് പറ്റിയില്ല. ജീവിതത്തില് എപ്പോഴെങ്കിലും എനിക്ക് സാറിനെ കാണണമെന്ന് ആഗ്രഹമുണ്ട്. പിന്നെ കൃഷ്ണകുമാര് സാര്. നമ്മുടെ ദിയ കൃഷ്ണയുടേ ഒക്കെ അച്ഛന്. പിന്നെ ഉണ്ണി മുകുന്ദന്, അഖില് മാരാര്, വിവേക് ഗോപന് ഇവരൊക്കെ ബിജെപിക്കാരാണ്.
ആരെന്ത് ചെയ്താലും നല്ല രീതിയില് പ്രവര്ത്തിക്കണം. പ്രവര്ത്തിക്കുക, നല്ലത് ചെയ്യുക, സമൂഹത്തിന് വേണ്ടി നല്ലത് ചെയ്യണം എന്ന് മാത്രമെ എനിക്ക് പറയാനുള്ളൂ. സമൂഹത്തിന് വേണ്ടി നല്ലത് ചെയ്യുന്നവരാണ് ഇവരെല്ലാവരും. അവരെ ഞാന് ബഹുമാനിക്കുന്നു. നല്ലത് ചെയ്യുന്നവരെ ഞാന് ബഹുമാനിക്കുന്നു. അത്രയേ ഉള്ളൂ. നമ്മുടെ മേയറെയും ഇഷ്ടമാണ്”, എന്നായിരുന്നു അനുമോളുടെ വാക്കുകൾ.
മുഖ്യമന്ത്രി പിണറായി വിജയനെ കുറിച്ച് അനുമോൾ പറഞ്ഞ കാര്യങ്ങളും ശ്രദ്ധനേടിയിരുന്നു. “ഉള്ളകാര്യം പറയാലോ, പിണറായി സാർ നല്ലതാണ്. സാറിനെ ഇഷ്ടപ്പെടാത്ത ആൾക്കാർ കാണുമായിരിക്കും. ഇഷ്ടപ്പെടുന്നവരും കാണും. അതൊക്കെ ഓരോരുത്തരുടെയും ഇഷ്ടമല്ലേ? ഞാൻ ഇഷ്ടപ്പെടുന്നപോലെ നിങ്ങൾ ഇഷ്ടപ്പെടണം എന്നില്ലല്ലോ”, എന്നായിരുന്നു അനുമോൾ പറഞ്ഞത്.
അതേസമയം, പ്രധാനമന്ത്രി നരേന്ദ്രമോദി ഇന്ന് കൊച്ചിയിൽ എത്തും. രാവിലെ 11:30 ന് എത്തുന്ന മോദി വിവിധ പരിപാടികളില് പങ്കെടുക്കും. എറണാകുളം മറൈന്ഡ്രൈവില് അഖില കേരള ധീവരസഭയുടെ സുവര്ണ ജൂബിലി ആഘോഷം ഉദ്ഘാടനം ചെയ്യും. കൊച്ചി സ്റ്റേഡിയത്തില് തയ്യാറാക്കിയ പ്രത്യേക വേദിയില് ഇന്ത്യന് റെയില്വേയുടേത് അടക്കം വിവിധ സര്ക്കാര് പദ്ധതികള് ഉദ്ഘാടനം ചെയ്യുമെന്നാണ് വിവരം. സ്റ്റേഡിയം കവാടത്തില് നിന്നും റോഡ് ഷോയില് പങ്കെടുത്താകും പ്രധാനമന്ത്രി വേദിയിലെത്തുക.
തുടര്ന്ന് കേരളത്തില് എന്ഡിഎയുടെ തെരഞ്ഞെടുപ്പ് പ്രവര്ത്തനങ്ങള് ഉദ്ഘാടനം ചെയ്യും. വരാനിരിക്കുന്ന നിയമസഭാ തെരഞ്ഞെടുപ്പില് എന്ഡിഎയുടെ പ്രകടനപത്രികയും മോദി പുറത്തിറക്കിയേക്കും.