തൃശൂര് : പലയിടങ്ങളിലും റോഡ് മുറിച്ച് കടക്കുന്നതിന് സീബ്ര ലൈനില് വാഹനങ്ങള് നിര്ത്തി തരുന്നില്ലെന്ന് ജില്ലാ കളക്ടറോട് കുട്ടിക്കൂട്ടുകാരുടെ പരാതി. ജില്ലാ കളക്ടറുടെ പ്രതിവാര പരിപാടിയായ മുഖാമുഖം: മീറ്റ് യുവര് കളക്ടര് 2 :0 ല് പങ്കെടുത്ത അരിമ്പൂര് ഗവ. യു പി. സ്കൂളിലെ കുട്ടികളാണ് ജില്ലാ കളക്ടര് ശിഖ സുരേന്ദ്രനോട് ഈ പരാതി ഉന്നയിച്ചത്.
നാല്, അഞ്ച്, ആറ്, ഏഴ് ക്ലാസുകളിലെ ഇരുപത്തിയാറോളം കുട്ടികളും അധ്യാപകരുമാണ് തങ്ങളുടെ പുതിയ കളക്ടറെ കാണാനെത്തിയത്. വരാനിരിക്കുന്ന വാര്ഷിക പരീക്ഷയെ കുറിച്ച് ചോദിച്ചറിഞ്ഞ് ആരംഭിച്ച സംവാദ പരിപാടിയില് സിവില് സര്വീസ് പരീക്ഷ, കളക്ടര് എന്ന നിലയിലുള്ള ചുമതലകള്, യുവാക്കള്ക്കിടയിലെ ലഹരി ഉപയോഗം, ബാല്യകാല അനുഭവങ്ങളും ഓര്മ്മകളും, തിരക്കേറിയ ഔദ്യോഗിക ജീവിതത്തിലെ വിശ്രമവേളകള്, തുടങ്ങിയ വിവിധ വിഷയങ്ങളെ കുറിച്ച് കുട്ടികള്ക്കിടയില് നിന്ന് ചോദ്യങ്ങളുയര്ന്നു.
സ്കൂളിലെ ‘ക്രിയേറ്റീവ് കോര്ണര് സ്കില് ട്രെയിനിങ്ങിന്റെ’ ഭാഗമായി കുട്ടികള് തയ്യാറാക്കിയ ബള്ബ്, ഫയല്, ജാം തുടങ്ങിയവ സ്കൂള് ലീഡര് കൈമാറി. കുട്ടികള്ക്കായി കളക്ടര് ഗാനമാലപിച്ചു. ഏഴാം ക്ലാസ് വിദ്യാര്ത്ഥി സാവന് ശങ്കര് കെ എസ് വരച്ച ചിത്രം കൈമാറി. കുട്ടികള് സ്വയം തയ്യാറാക്കിയ കേക്ക് മുറിച്ച് സന്തോഷം പങ്കിട്ടും ഫോട്ടോയെടുത്തും കളക്ടറേറ്റ് എന്ട്രന്സ് ഹാളില് ‘സ്വീപി’ന്റെ ഭാഗമായി ഒരുക്കിയ വോട്ടിംഗ് മെഷീന് പരിചയപ്പെട്ടും മോക്ക് പോള് ചെയ്തും സിവില് സ്റ്റേഷന് ചുറ്റിക്കറങ്ങിയുമാണ് അവര് മടങ്ങിയത്.
പ്രധാന അധ്യാപിക ഷാലി കാതറിന് സി ജി, അധ്യാപകരായ ഷൈജു ഒ കെ, അന്നു പോള്, ലത കെ എന്നിവര് വിദ്യാര്ത്ഥികളോടൊപ്പം പങ്കെടുത്തു.