തൃശൂര്: വടക്കാഞ്ചേരിയില് സ്കൂള് വിദ്യാര്ത്ഥികളെ സ്വകാര്യ ബസില് കയറ്റാത്ത സംഭവത്തില് കണ്ടക്ടര് രാമദാസിന്റെ ലൈസന്സ് മൂന്ന് മാസത്തേക്ക് സസ്പെന്ഡ് ചെയ്തു. കണ്ടക്ടര്ക്ക് ബോധവത്കരണം നല്കാനും മോട്ടോര് വാഹന വകുപ്പ് തീരുമാനിച്ചു.
വടക്കാഞ്ചേരി ജോയിന്റ് ആര്ടിഓ ഓഫീസിലേക്ക് കണ്ടക്ടറെ വിളിച്ചു വരുത്തി വിശദീകരണം തേടിയ ശേഷമാണ് നടപടി. കൈകൂപ്പി അഭ്യര്ത്ഥിച്ചിട്ടും വിദ്യാര്ത്ഥികളെ ബസില് കയറ്റാതെ പുറത്തു നിര്ത്തുകയായിരുന്നു കണ്ടക്ടര്. ദൃശ്യം പ്രചരിച്ചതോടെയാണ് സംഭവം വിവാദമായത്. പ്രതിഷേധമുയര്ത്തി വിദ്യാര്ത്ഥി സംഘടനകളും രംഗത്തെത്തിയിരുന്നു.
വൈകിട്ട് സ്കൂള് വിട്ട് വടക്കാഞ്ചേരി ബസ് സ്റ്റാന്ഡില് നിന്ന് വീട്ടിലേക്ക് പോകാന് നിന്ന വിദ്യാര്ത്ഥികള്ക്കാണ് സ്വകാര്യബസ് കണ്ടക്ടറില് നിന്നും അപമാനം ഏര്ക്കേണ്ടി വന്നത്. വിദ്യാര്ത്ഥികള്ക്ക് കണ്സഷന് നിരക്ക് ആയതിനാല് കുറച്ചു പേരെ മാത്രമേ കൊണ്ടു പോകാന് കഴിയൂ എന്ന് ആയിരുന്നു കണ്ടക്ടറുടെ നിലപാട്. വീട്ടിലെത്താന് വൈകുമെന്നതിനാല് സഹായിക്കണമെന്ന് കുട്ടി കൈകൂപ്പി പറഞ്ഞിട്ടും കണ്ടക്ടര് വഴങ്ങിയില്ല.ദൃശ്യങ്ങള് പുറത്തുവന്നതോടെ ജില്ലാ ഭരണകൂടവും പൊലീസും മോട്ടോര് വാഹന വകുപ്പും ഇടപെട്ടു.
വടക്കാഞ്ചേരി പൊലീസും ബസ്റ്റാന്ഡുകളില് പരിശോധന കര്ശനമാക്കി. ബസുടമകള്ക്കും താക്കീതു നല്കി.