പത്തനംതിട്ട: ശബരിമല സ്വര്ണക്കൊള്ളയില് രാഹുല് ഗാന്ധി പത്തനംതിട്ടയില് നടത്തിയ പ്രസ്താവന അടിസ്ഥാനരഹിതമെന്ന് ബിഡിജെഎസ് പ്രസിഡന്റ് തുഷാര് വെള്ളാപ്പള്ളി. സ്വര്ണക്കൊള്ളയ്ക്കെതിരെ ശക്തമായ പ്രക്ഷോഭം നടത്തിയത് ബിജെപിയാണ്. സ്വര്ണക്കൊള്ളയെ പ്രധാനമന്ത്രി നരേന്ദ്ര മോദി ശക്തമായി അപലപിച്ചിട്ടുണ്ട്. ഇക്കാര്യങ്ങള് മറച്ചുവെച്ചാണ് രാഹുല് പത്തനംതിട്ടയില് പ്രസംഗിച്ചതെന്നും മീറ്റ് ദ പ്രസ് പരിപാടിയില് തുഷാര് വ്യക്തമാക്കി. തീവ്രവാദ സംഘടനകളുടെ വോട്ട് നേടാന് ഇടത് വലത് മുന്നണികള് മത്സരിക്കുകയാണ്. തെരഞ്ഞെടുപ്പില് എന്ഡിഎ വലിയ മുന്നേറ്റം ഉണ്ടാക്കും. എന്ഡിഎ എംഎല്എമാരുടെ പിന്തുണ ഇല്ലാതെ ഇരുമുന്നണികള്ക്കും മന്ത്രിസഭ രൂപീകരിക്കാന് കഴിയില്ലെന്നും തുഷാര് പറഞ്ഞു.
എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് തെരഞ്ഞെടുപ്പുമായി ബന്ധപ്പെട്ടു നടത്തുന്ന അഭിപ്രായ പ്രകടനങ്ങള് അദ്ദേഹത്തിന്റെ വ്യക്തിപരമായ ബോധ്യത്തിന്റെ അടിസ്ഥാനത്തില് ഉള്ളതാണ്. മാധ്യമ അഭിമുഖങ്ങളിലാണ് വെള്ളാപ്പള്ളി അഭിപ്രായങ്ങള് പറയുന്നത്. അവയൊന്നും എസ്എന്ഡിപി യോഗത്തിന്റെ ഔദ്യോഗിക തീരുമാനമല്ല. യോഗം കൗണ്സില് ചര്ച്ചചെയ്താണ് എസ്എന്ഡിപിയുടെ തീരുമാനങ്ങള് എടുക്കുന്നത്. യോഗത്തിന്റെ ഔദ്യോഗിക പിന്തുണ ആര്ക്കും പ്രഖ്യാപിച്ചിട്ടില്ല. എസ്എന്ഡിപി യോഗത്തില് വിവിധ പാര്ട്ടി അംഗങ്ങളുണ്ട്. അതിനാല് യോഗത്തിന് രാഷ്ട്രീയ തീരുമാനങ്ങളില്ല. തെരഞ്ഞെടുപ്പില് ഒരു മുന്നണിയെയും പിന്തുണയ്ക്കാന് യോഗം കൗണ്സില് തീരുമാനിച്ചിട്ടില്ലെന്നും തുഷാര് പറഞ്ഞു.
ബിജെപി പത്തനംതിട്ട ജില്ലാ അധ്യക്ഷന് അഡ്വ. വി.എ. സൂരജ്, ബിഡിജെഎസ് സംസ്ഥാന ഉപാധ്യക്ഷന് കെ. പത്മകുമാര് എന്നിവരും പങ്കെടുത്തു. പത്തനംതിട്ട പ്രസ് ക്ലബ് വൈസ് പ്രസിഡന്റ് സി.കെ. അഭിലാല് അധ്യക്ഷനായി.