ടെഹ്റാന്‍: റഡാറിന് പോലും പിടികൊടുക്കാത്ത അത്രയ്‌ക്ക് ആകാശത്ത് ഒളിഞ്ഞിരിക്കാന്‍ കഴിയുന്ന യുദ്ധവിമാനമാണ് എഫ് 35. വില 830 കോടി രൂപ. അതാണ് കഴിഞ്ഞ ദിവസം ഇറാന്‍ വീഴ്‌ത്തിയതെന്ന് പറയുന്നു. തീ പിടിച്ചതിനെ തുടര്‍ന്ന് വിമാനം അടിയന്തരമായി ഭൂമിയില്‍ ഇറക്കേണ്ടിവന്നു. പൈലറ്റ് വിമാനത്തില്‍ നിന്നും ഇജക്ട് ചെയ്ത് രക്ഷപെട്ടു.

എഫ്-35 ആക്രമിക്കുന്നതിന്റെ ദൃശ്യങ്ങള്‍ ഇറാന്‍ റവല്യൂഷനറി ഗാര്‍ഡും പുറത്തുവിട്ടിട്ടുണ്ട്.. മധ്യ ഇറാനില്‍ വച്ചാണ് വിമാനം ആക്രമിച്ചതെന്നും സാരമായ നഷ്ടമുണ്ടാക്കിയിട്ടുണ്ടെന്നും ഐആര്‍ജിസിയുടെ പ്രസ്താവനയില്‍ പറയുന്നു. വ്യാഴാഴ്ച പുലര്‍ച്ചെ 2.50ഓടെയായിരുന്നു ആക്രമണമെന്നും അമേരിക്കയുടെയും ഇസ്രയേലിന്റെയും 125 ലേറെ ഡ്രോണുകളെ ഫലപ്രദമായി പ്രതിരോധിച്ചുവെന്നും ഇറാന്‍ അറിയിച്ചു.

ലോകത്തിലേക്കും തന്നെ മികച്ച യുദ്ധവിമാനങ്ങളിലൊന്നായ എഫ്-35ന് നേരെ ഇതാദ്യമായാണ് ഇത്ര രൂക്ഷമായ ആക്രമണം ഉണ്ടാകുന്നത്. ബ്ലൂംബര്‍ഗിന്റെ റിപ്പോര്‍ട്ട് അനുസരിച്ച്‌ യുദ്ധം ആരംഭിച്ചതിന് ശേഷം ഇതുവരെ അമേരിക്കയ്‌ക്ക് 16 യുദ്ധവിമാനങ്ങള്‍ നഷ്ടമായിട്ടുണ്ട്. 10 എണ്ണം ഡ്രോണ്‍ ആക്രമണത്തിലും ആറ് വിമാനങ്ങള്‍ അല്ലാതെയുള്ള ആക്രമണങ്ങളിലും അപകടങ്ങളിലുമാണ് തകര്‍ന്നത്.

വീഡിയോയില്‍ അജ്ഞാതമായ ഒരു ചെറിയ വസ്തു വന്ന് എഫ് 35ല്‍ ഇടിക്കുന്നത് കാണാം. ഇതോടെയാണ് വിമാനത്തിന് തീ പിടിക്കുന്നത്. ഇതുവരെയും അമേരിക്കയുടെ ഭാഗത്ത് നിന്നും ഈ വസ്തു എന്താണെന്നത് സംബന്ധിച്ച് സ്ഥിരീകരണം ഉണ്ടായിട്ടില്ല.