കോഴിക്കോട്‌: മുന്‍മന്ത്രിയും കോണ്‍ഗ്രസ്‌ നേതാവുമായിരുന്ന എം.ടി. പത്മ അന്തരിച്ചു. 81 വയസായിരുന്നു. വാര്‍ദ്ധക്യ സഹജമായ അസുഖത്തെ തുടര്ന്ന് മുംബൈയിലായിരുന്നു അന്ത്യം. മുംബൈയില്‍ മകള്‍ക്കൊപ്പമായിരുന്നു ഏറെ നാളായി താമസം. ഭൗതികദേഹം ഇന്ന്‌ കോഴിക്കോട്ടെത്തിക്കും.
ഫിഷറീസ്‌-ഗ്രാമ വികസന-രജിസ്‌ട്രേഷന്‍ വകുപ്പ്‌ മന്ത്രിയും എട്ടും ഒന്‍പതും കേരള നിയമസഭകളില്‍ കൊയിലാണ്ടിയില്‍ നിന്നുള്ള അംഗവുമായിരുന്നു. കേരള മന്ത്രിസഭയില്‍ അംഗമായ മൂന്നാമത്തെ വനിതായിരുന്നു എം.ടി പത്മ.
നിയമത്തില്‍ ബിരുദവും ആര്‍ട്ട്‌സില്‍ ബിരുധാനാന്തര ബിരുദവും നേടിയ പത്മ കോണ്‍ഗ്രസിന്റെ വിദ്യാര്‍ഥി പ്രസ്‌ഥാനമായ കെ.എസ്‌.യു.വിലൂടെയാണ്‌ രാഷ്ര്‌ടീയത്തിലേയ്‌ക്ക് വരുന്നത്‌. കെ.എസ്‌.യു സംസ്‌ഥാന വൈസ്‌ പ്രസിഡന്റ്‌, കെ.പി.സി.സി അംഗം, മഹിളാ കോണ്‍ഗ്രസ്‌ ജനറല്‍ സെക്രട്ടറി, കോഴിക്കോട്‌ ഡി.സി.സി സെക്രട്ടറി, ട്രഷറര്‍ എന്നീ നിലകളില്‍ പ്രവര്‍ത്തിച്ചു.
1999-ല്‍ പാലക്കാട്‌ നിന്നും 2004-ല്‍ വടകരയില്‍ നിന്നും ലോക്‌സഭയിലേയ്‌ക്ക് മത്സരിച്ചെങ്കിലും പരാജയപ്പെട്ടു. കെ. കരുണാകരന്‍ ഡി.ഐ.സി. രൂപീകരിച്ചപ്പോള്‍ അതിലേക്കു പോയ പത്മ പിന്നീട്‌ കോണ്‍ഗ്രസില്‍ തിരിച്ചെത്തി. 2013-ല്‍ കോഴിക്കോട്‌ കോര്‍പ്പറേഷനിലേയ്‌ക്ക് കോണ്‍ഗ്രസ്‌ കൗണ്‍സിലറായി തെരഞ്ഞെടുക്കപ്പെടുകയും പ്രതിപക്ഷ നേതാവാകുകയും ചെയ്‌തു.