രാമേശ്വരത്തെ പുതിയ പാമ്പൻ കടൽപ്പാലത്തിലൂടെയുള്ള ട്രെയിനിന്‍റെ പരീക്ഷണ ഓട്ടം വിജയകരം. ദക്ഷിണ മേഖലാ റെയിൽവേ സുരക്ഷാ കമ്മീഷണർ എ.എം.ചൌധരിയുടെ മേൽനോട്ടത്തിലാണ് പരിശോധന നടന്നത്. ട്രെയിൻ മണ്ഡപം- പാമ്പൻ റെയില്‍വെ സ്റ്റേഷനുകൾക്കിടയിലാണ് ഓടിച്ചത്. പഴയ പാമ്പൻ പാലത്തിന് സമാന്തരമായാണ് പുതിയ പാലം നിര്‍മിച്ചിരിക്കുന്നത്.

പുതിയ പാലം ഗതാഗതത്തിന് തുറന്നുകൊടുക്കുന്നതിന് മുൻപുളള അവസാന നടപടിക്രമമാണ് വിജയകരമായി പൂർത്തിയായത്. പാലത്തിന്‍റെ ഉദ്ഘാടന തീയതി സുരക്ഷാ കമ്മീഷണർ റിപ്പോർട്ട് സമർപ്പിച്ചതിന് ശേഷം തീരുമാനിക്കും.

രാജ്യത്തെ കപ്പലുകൾക്ക് കടന്നുപോകാൻ ഒരുഭാഗം ലംബമായി ഉയരുന്ന ആദ്യ വെർട്ടിക്കൽ ലിഫ്ടിംഗ് കടൽപ്പാലമാണ് പാമ്പനിലേത്. 535 കോടി രൂപ ചെലവിലാണ് റെയിൽവേ എഞ്ചിനീയറിങ് വിഭാഗം പാലം നിർമ്മിച്ചത്. പ്രധാനമന്ത്രി ഈ മാസം അവസാനമോ അടുത്ത മാസം ആദ്യമോ പാലം ഉദ്ഘാടനം ചെയ്യുമെന്നാണ് ലഭിക്കുന്ന വിവരം.