വാരാണസിയിൽ പോലീസ് ഉദ്യോഗസ്ഥന് നേരെ ആൾക്കൂട്ട മർദ്ദനം. കുടുംബത്തോടൊപ്പം യാത്ര ചെയ്യുമ്പോഴാണ് മർദ്ദനമേറ്റത്. പോലീസുകാരൻ ഓടിച്ച കാർ ഓട്ടോയിൽ ഇടിച്ചതോടെയാണ് പ്രശ്നങ്ങളുടെ തുടക്കം. തുടര്‍ന്ന് തർക്കം കൈയാങ്കളിയിലെത്തുകയായിരുന്നു.

തടിച്ചുകൂടിയ ആളുകൾ പോലീസുകാരനെ പൊതിരെ തല്ലി. ഭാര്യയും മക്കളും നോക്കി നിൽക്കെയായിരുന്നു മർദ്ദനം. ഈ സമയം ഇയാൾ യൂണിഫോം ധരിച്ചിട്ടുണ്ടായിരുന്നില്ല. താൻ പൊലീസുകാരനാണെന്നും കുടുംബത്തിന് മുന്നിലിട്ട് മർദ്ദിക്കരുതെന്ന് കരഞ്ഞ് പറഞ്ഞിട്ടും ആളുകൾ കൂട്ടാക്കിയില്ല.

വടിയടക്കം ഉപയോ​ഗിച്ചാണ് മർദ്ദനം. സമീപത്തെ പൊലീസ് ഉദ്യോ​ഗസ്ഥൻ ഇടപെട്ടിട്ടും ഫലമുണ്ടായില്ല. ഒരാജാതലാബ് സ്റ്റേഷനിലെ എസ്എച്ച്ഒയായ അജിത് വെർമ എന്ന ഉദ്യോ​ഗസ്ഥനാണ് മർദ്ദനമേറ്റത്. സംഭവത്തിൽ ഇരുവിഭാ​ഗവും പരാതി നൽകി.