യാത്രക്കാര്‍ക്ക് നല്‍കുന്ന സേവനങ്ങളുടെ പേരിലാണ് എപ്പോഴും റെയില്‍വേ വിവാദത്തിലാകാറ്. എന്നാല്‍ വൈകിയാല്‍ ഒരു വിവാഹം പാളംതെറ്റുമെന്ന ഘട്ടത്തില്‍ വേണ്ടവിധത്തില്‍ സൗകര്യങ്ങള്‍ ഒരുക്കിക്കൊടുത്തതിന്റെ പേരിലാണ് ഇപ്പോള്‍ ഇന്ത്യന്‍ റെയില്‍വേ വാര്‍ത്തകളില്‍ നിറയുന്നത്. ചന്ദ്രശേഖര്‍ വാഗ് എന്നയാളാണ് കഥാനായകന്‍. മുംബൈയില്‍ നിന്നും ഗുവാഹത്തിയിലേക്ക് കുടുംബത്തോടൊപ്പം യാത്ര ചെയ്ത വരന്‍ തങ്ങളുടെ ട്രെയിന്‍ 3-4 മണിക്കൂര്‍ വൈകിയാല്‍ കണക്ടിംഗ് ട്രെയിന്‍ നഷ്ടമാകുമെന്ന ഘട്ടത്തിലാണ് റെയില്‍വേ നാടകീയമായി ഇടപെട്ടത്.

ഗീതാഞ്ജലി എക്സ്പ്രസില്‍ മുംബൈയില്‍ നിന്ന് ഗുവാഹത്തിയിലേക്ക് കുടുംബത്തോടൊപ്പം യാത്ര ചെയ്യുകയായിരുന്നു വരന്‍. അത് 3-4 മണിക്കൂര്‍ വൈകി. വൈകാതെ കൊല്‍ക്കത്തയിലെ ഹൗറ സ്റ്റേഷനില്‍ നിന്നുള്ള അവരുടെ കണക്ടിംഗ് ട്രെയിനായ സരാഘട്ട് എക്‌സ്പ്രസ് നഷ്ടമാകുമെന്ന് വാഗ് മനസ്സിലാക്കി. ഒട്ടും സമയം കളയാതെ, വാഗ് എക്സ് എടുക്കുകയും സ്ഥിതിഗതികളുടെ ഗൗരവത്തെക്കുറിച്ച് റെയില്‍വേ മന്ത്രി അശ്വിനി വൈഷ്ണവിനെ അറിയിക്കുകയും ചെയ്തു. തനിക്കൊപ്പം മുതിര്‍ന്ന പൗരന്മാരുണ്ടെന്നും വാഗ് എടുത്തുപറഞ്ഞു.

34 യാത്രക്കാര്‍ക്കുള്ള ഗതാഗതം ക്രമീകരിക്കാന്‍ സാധ്യമായ ബദലുകളൊന്നുമില്ലെന്നും വിവാഹത്തിന് കൃത്യസമയത്ത് എത്താന്‍ കഴിയില്ലെന്ന് ഭയപ്പെടുന്നതായും എക്‌സില്‍ കുറിച്ചു. മന്ത്രിയുടെ പ്രതികരണം ഉടനടി വന്നു. ഈസ്റ്റേണ്‍ റെയില്‍വേയുടെ ജനറല്‍ മാനേജരുടെ നിര്‍ദ്ദേശപ്രകാരം ഹൗറയിലെ ഡിവിഷണല്‍ റെയില്‍വേ മാനേജര്‍ (ഡിആര്‍എം), സീനിയര്‍ ഡിവിഷണല്‍ കൊമേഴ്സ്യല്‍ മാനേജര്‍ (എസ്ആര്‍ ഡിസിഎം) എന്നിവരുടെ യോജിച്ച ശ്രമങ്ങളോടെ നിരവധി പ്രവര്‍ത്തനങ്ങള്‍ ആരംഭിച്ചു.

സരാഘട്ട് എക്‌സ്പ്രസ് ഹൗറയില്‍ കുറച്ചുനേരം നിര്‍ത്തി. അതേസമയം, ഗീതാഞ്ജലി എക്സ്പ്രസിന്റെ പൈലറ്റിനെ സ്ഥിതിഗതികള്‍ വിവരിക്കുകയും എത്തിച്ചേരല്‍ വേഗത്തിലാക്കാന്‍ നിര്‍ദേശിക്കുകയും ചെയ്തു. ഗീതാഞ്ജലി എക്സ്പ്രസിന് കാലതാമസം കൂടാതെ ലക്ഷ്യസ്ഥാനത്ത് എത്താന്‍ റെയില്‍വേ എല്ലാ ക്രമീകരണങ്ങളും ചെയ്തു. ഇതിനിടയില്‍, ഹൗറയിലെ സ്റ്റേഷന്‍ ജീവനക്കാര്‍ യാത്രക്കാരെയും അവരുടെ ലഗേജുകളും പ്ലാറ്റ്ഫോം 21 ല്‍ നിന്ന് സരാഘട്ട് എക്സ്പ്രസ് നിലയുറപ്പിച്ച പ്ലാറ്റ്ഫോം 9 ലേക്ക് വേഗത്തില്‍ മാറ്റിക്കൊടുത്തു.

എല്ലാശ്രമങ്ങളും വിജയിച്ചതോടെ യാത്രക്കാരെ ഗീതാഞ്ജലി എക്‌സ്പ്രസിന് അതിന്റെ പുതുക്കിയ ഷെഡ്യൂളിന് മുമ്പായി തന്നെ ഹൗറയില്‍ എത്തിക്കാനായി. ഹൗറയില്‍ വന്നയുടന്‍ വിവാഹപാര്‍ട്ടിയിലെ 35 അംഗങ്ങളും സരാഘട്ട് എക്‌സ്പ്രസില്‍ ഏതാനും മിനിറ്റുകള്‍ക്കുള്ളില്‍ തന്നെ കയറുകയും ചെയ്‌തെന്ന് റെയില്‍വേ ജീവനക്കാര്‍ ഉറപ്പു വരുത്തുകയും ചെയ്തു. ”ഇത് വെറുമൊരു സേവനമായിരുന്നില്ല, വലിയ കാരുണ്യപ്രവൃത്തിയായിരുന്നു. ഈ ഇടപെടല്‍ ഇല്ലായിരുന്നെങ്കില്‍ എനിക്കും എന്റെ കുടുംബത്തിനും ജീവിതത്തില്‍ പകരം വെക്കാനില്ലാത്ത ഒരു നിമിഷം നഷ്ടമാകുമായിരുന്നു. ഇന്ത്യന്‍ റെയില്‍വേയോട് ഞാന്‍ അങ്ങേയറ്റം നന്ദിയുള്ളവനാണ്’ എന്ന് വാഗ് തന്റെ നന്ദി അറിയിച്ചു.