അവധിക്കാലത്ത് വ്യാജ വാടക പരസ്യങ്ങൾക്കെതിരെ ഉമ്മുൽ ഖുവൈൻ നിവാസികൾക്ക് മുന്നറിയിപ്പ്

ഉമ്മുൽ ഖുവൈൻ എമിറേറ്റിലുടനീളമുള്ള അവധിക്കാല വാടക കേന്ദ്രങ്ങളുടെ (holiday rental venues) പരസ്യങ്ങളിൽ ജാഗ്രത പാലിക്കണമെന്ന് ഉമ്മുൽ ഖുവൈനിലെ താമസക്കാർക്കും സന്ദർശകർക്കും മുന്നറിയിപ്പ് നൽകി.

ചാലറ്റുകൾ (chalets), റെസ്റ്റ് ഹൗസുകൾ, വില്ലകൾ, ഫാമുകൾ എന്നിവയുടെ ഓൺലൈൻ പരസ്യങ്ങൾ കൈകാര്യം ചെയ്യുമ്പോൾ ജാഗ്രത പാലിക്കണമെന്ന് ഉമ്മുൽ ഖുവൈൻ പൊലീസ് പൊതുജനങ്ങളോട് അഭ്യർത്ഥിച്ചു.

ഏതെങ്കിലും ബുക്കിംഗോ പണമടയ്ക്കലോ നടത്തുന്നതിന് മുൻപ് പരസ്യത്തിന്റെ നിജസ്ഥിതിയും പരസ്യദാതാവിന്റെ വിശ്വസനീയതയും പരിശോധിച്ച് ഉറപ്പുവരുത്തേണ്ടതിന്റെ പ്രാധാന്യം അതോറിറ്റി എടുത്തുപറഞ്ഞു.

ഇത്തരം തട്ടിപ്പുകളിൽ പലപ്പോഴും ഇരകളെ ആകർഷിക്കുന്നതിനും പണം അയപ്പിക്കുന്നതിനുമായി ആകർഷകമായ വിലകളാണ് “പരസ്യദാതാക്കൾ” വാഗ്ദാനം ചെയ്യുന്നത്.

ഇത്തരം ഓഫറുകളിൽ വീഴരുതെന്നും വ്യക്തിഗത അക്കൗണ്ടുകളിലേക്കോ അപരിചിതമായ അക്കൗണ്ടുകളിലേക്കോ പണം അയക്കരുതെന്നും പൊലീസ് പൊതുജനങ്ങൾക്ക് മുന്നറിയിപ്പ് നൽകി. ഏതൊരു സാമ്പത്തിക ഇടപാടും പൂർത്തിയാക്കുന്നതിന് മുൻപ് പരസ്യദാതാവിന്റെ വിവരങ്ങളും വാഗ്ദാനം ചെയ്യുന്ന വസ്തുവിന്റെ വിവരങ്ങളും പരിശോധിക്കേണ്ടതുണ്ട്.

ഏതെങ്കിലും തരത്തിലുള്ള തട്ടിപ്പ് ശ്രമങ്ങളോ സംശയാസ്പദമായ പരസ്യങ്ങളോ വെബ്‌സൈറ്റുകളോ ശ്രദ്ധയിൽപ്പെട്ടാൽ ഔദ്യോഗിക ചാനലുകൾ വഴി റിപ്പോർട്ട് ചെയ്യാൻ പൊതുജനങ്ങളോട് അഭ്യർത്ഥിച്ചിട്ടുണ്ട്.

എങ്ങനെ പരിശോധിക്കാം?

പരസ്യങ്ങൾ വ്യാജമാണോ അല്ലയോ എന്ന് യാത്രക്കാർക്ക് പരിശോധിക്കാനുള്ള വഴികൾ താഴെ നൽകുന്നു:

പരസ്യദാതാവിന്റെ ഐഡന്റിറ്റിയും വസ്തുവിന്റെ ഉടമസ്ഥാവകാശവും പരിശോധിക്കുക.

വസ്തുവും അതിന്റെ സ്ഥാനവും (location) നേരിട്ട് കണ്ട് ഉറപ്പുവരുത്തുന്നതിന് മുൻപ് പണം കൈമാറരുത്.

ഒരു കരാറോ ഔദ്യോഗിക ബുക്കിംഗ് സ്ഥിരീകരണമോ ആവശ്യപ്പെടുക.

എല്ലാ സന്ദേശങ്ങളുടെയും രേഖകളുടെയും പണമടച്ചതിന്റെ രസീതുകളുടെയും കോപ്പികൾ സൂക്ഷിക്കുക.

തിരക്കേറിയ അവധിക്കാലത്ത് വ്യാജ യാത്രാ ഓഫറുകളും തട്ടിപ്പ് ബുക്കിംഗുകളും വർദ്ധിക്കുന്നതിനെതിരെ ഈ വർഷം ആദ്യം ദുബായ് പൊലീസും മുന്നറിയിപ്പ് നൽകിയിരുന്നു.

പെട്ടെന്ന് പണമടയ്ക്കാൻ ആളുകളെ പ്രേരിപ്പിക്കുന്നതിനായി വൻ വിലക്കിഴിവോടെ പരസ്യം ചെയ്യുന്ന വ്യാജ ട്രാവൽ പാക്കേജുകൾ, ഹോട്ടൽ റിസർവേഷനുകൾ, എയർലൈൻ ടിക്കറ്റുകൾ എന്നിവ ഉപയോഗിച്ചാണ് തട്ടിപ്പുകാർ ആളുകളെ ലക്ഷ്യമിടുന്നതെന്ന് അതോറിറ്റി വ്യക്തമാക്കി.

അവധിക്കാലത്തും വേനൽക്കാല അവധിക്കാലത്തും അന്താരാഷ്ട്ര വിനോദസഞ്ചാര കേന്ദ്രങ്ങളിലേക്ക് കുറഞ്ഞ നിരക്കിൽ ബുക്കിംഗ് ലഭിക്കാനുള്ള ആളുകളുടെ ആഗ്രഹം തട്ടിപ്പുകാർ മുതലെടുക്കുന്നതിനാൽ ഇത്തരം ഇലക്ട്രോണിക് തട്ടിപ്പുകൾ വർദ്ധിക്കാറുണ്ടെന്ന് അധികൃതർ വ്യക്തമാക്കി.