മനാമ: ബഹ്റൈൻ ഇന്ത്യൻ സ്കൂളിന്റെ ചരിത്രത്തിൽ ഏറ്റവും കൂടുതൽ കാലം സേവനമനുഷ്ഠിച്ച പ്രിൻസിപ്പലായ വി.ആർ പളനിസ്വാമിക്ക് സ്കൂളിൽ ഔദ്യോഗിക യാത്രയയപ്പ് നൽകി. 15 വർഷം പ്രിൻസിപ്പലായി സേവനമനുഷ്ഠിച്ചതുൾപ്പെടെ സ്കൂളിനായി സമർപ്പിച്ച 25 വർഷത്തെ സേവനത്തെ മുൻനിർത്തിയാണ് അദ്ദേഹത്തെ ആദരിച്ചത്.
ചടങ്ങിൽ സ്കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, വൈസ് ചെയർമാനും സ്പോർട്സ് അംഗവുമായ ഡോ. മുഹമ്മദ് ഫൈസൽ, അസി. സെക്രട്ടറിയും അക്കാദമിക അംഗവുമായ രഞ്ജിനി മോഹൻ, ഫിനാൻസ് ഐടി അംഗം ബോണി ജോസഫ്, പ്രോജക്ട് ആൻഡ് മെയിന്റനൻസ് അംഗം മിഥുൻ മോഹൻ, ട്രാൻസ്പോർട്ട് അംഗം മുഹമ്മദ് നയാസ് ഉല്ല, ജൂനിയർ വിംഗ് പ്രിൻസിപ്പൽ പമേല സേവ്യർ, സീനിയർ സ്കൂൾ അക്കാദമിക അഡ്മിനിസ്ട്രേഷൻ വൈസ് പ്രിൻസിപ്പൽ ജി. സതീഷ്, വൈസ് പ്രിൻസിപ്പൽ രാജേഷ് നായർ, ജൂനിയർ വിംഗ് വൈസ് പ്രിൻസിപ്പൽ പ്രിയ ലാജി, സ്റ്റാഫ് പ്രതിനിധി പാർവതി ദേവദാസ് എന്നിവർ പങ്കെടുത്തു.
ഗൾഫിലെ സിബിഎസ്ഇ സ്കൂളുകളുടെ കൗൺസിലിനെ പ്രതിനിധീകരിച്ച് ഡോ. മുഹമ്മദ് തയ്യാബ് (ഇബ്നുൽ ഹൈതം ഇസ്ലാമിക് സ്കൂൾ), മോളി ട്രീസ മാമ്മൻ (ഏഷ്യൻ സ്കൂൾ), ഡോ. അരുൺ കുമാർ ശർമ്മ (ന്യൂ മില്ലേനിയം സ്കൂൾ), മോണിക്ക സേഥി (അൽ നൂർ ഇന്റർനാഷണൽ സ്കൂൾ), ഗോപിനാഥ് മേനോൻ (ന്യൂ ഇന്ത്യൻ സ്കൂൾ), സജി ജേക്കബ് (ബഹ്റൈൻ ഇന്ത്യൻ സ്കൂൾ), മുൻ ഭരണസമിതി അംഗം രാജേഷ് നമ്പ്യാർ എന്നിവരും സന്നിഹിതരായിരുന്നു.
ജൂനിയർ വിംഗ് പ്രിൻസിപ്പൽ പമേല സേവ്യർ ചടങ്ങിൽ സ്വാഗതം പറഞ്ഞു. ചെയർമാൻ അഡ്വ. ബിനു മണ്ണിൽ വറുഗീസ് തന്റെ അനുമോദന പ്രസംഗത്തിൽ വി.ആർ പളനിസ്വാമിയുടെ നേതൃത്വത്തെയും, അക്കാദമിക മികവിനോടുള്ള സമർപ്പണത്തെയും, വിദ്യാർത്ഥികളുടെയും ജീവനക്കാരുടെയും ക്ഷേമത്തിനായുള്ള അചഞ്ചലമായ പ്രതിബദ്ധതയെയും സമൃദ്ധമായി പ്രശംസിച്ചു. പളനിസ്വാമിയുടെ ജീവിതയാത്രയിലെ അവിസ്മരണീയ നിമിഷങ്ങളും നേട്ടങ്ങളും എടുത്തുകാട്ടുന്ന പ്രത്യേക വീഡിയോ അവതരണവും ചടങ്ങിൽ ശ്രദ്ധേയമായി.
ഭാര്യ ചന്ദ്ര പളനിസ്വാമി, മകൻ ഡോ. സന്ദീപ് കുമാർ എന്നിവരുടെ സാന്നിധ്യത്തിൽ അഡ്വ. ബിനു മണ്ണിൽ വറുഗീസ് പളനിസ്വാമിയെ ആദരസൂചകമായി ഷാൾ അണിയിക്കുകയും മെമന്റോ സമ്മാനിക്കുകയും ചെയ്തു. സ്റ്റാഫ് ക്ലബ്ബിന്റെ പ്രത്യേക മെമന്റോ പമേല സേവ്യർ സമ്മാനിച്ചു. തന്റെ സേവനകാലയളവിലുടനീളം നൽകിയ വിശ്വാസത്തിനും സഹകരണത്തിനും ഭരണസമിതി, സ്റ്റാഫ്, രക്ഷിതാക്കൾ, സ്കൂൾ സമൂഹം എന്നിവർക്ക് പളനിസ്വാമി മറുപടി പ്രസംഗത്തിൽ ഹൃദയംഗമമായ നന്ദി രേഖപ്പെടുത്തി.
ചടങ്ങിൽ ഏഷ്യൻ സ്കൂളിൽ നിന്നും വിരമിക്കുന്ന പ്രിൻസിപ്പൽ മോളി ട്രീസ മാമ്മനെയും ആദരിച്ചു. കൂടാതെ ഇന്ത്യൻ സ്കൂളിൽ 10, 15, 20, 25, 30 വർഷത്തെ സേവനം പൂർത്തിയാക്കിയ ജീവനക്കാർക്ക് ദീർഘകാല സേവന അവാർഡുകൾ നൽകി ആദരിക്കുകയും ചെയ്തു. സെക്രട്ടറി വി. രാജപാണ്ഡ്യൻ ചടങ്ങിൽ നന്ദി രേഖപ്പെടുത്തി.