കൊച്ചി: മൂന്ന് പേരുടെ മരണത്തിനിടയാക്കിയ നെടുമ്പാശ്ശേരി മിനി കൂപ്പർ അപകടത്തിൽ പ്രതിയായ 19കാരനായ യുവാവിന് മദ്യം നൽകിയ സംഭവത്തിൽ കൊച്ചിയിലെ മൂന്ന് ബാറുകളുടെ ലൈസൻസ് സസ്‌പെൻഡ് ചെയ്തു. പ്രതി സുഹൈലിന് മദ്യം നൽകിയ നടപടിയിലാണ് ബാറുകളുടെ ലൈസൻസ് സസ്പെൻസ് ചെയ്തത്. എക്സൈസ് കമ്മീഷണർ സാംബശിവ റാവു ആണ് നടപടിക്ക് നിർദേശം നൽകിയത്.
കടവന്ത്ര ദയ ബാർ, മൺസൂൺ എംപ്രസ് പാലാരിവട്ടം, മാരിയറ്റ് ഹോട്ടൽ നെടുമ്പാശ്ശേരി എന്നീ ബാറുകൾക്ക് എതിരെയാണ് എക്സൈസ് വകുപ്പിൻ്റെ നടപടി. പ്രതിയുടെ പ്രായം 19 വയസ്സ് മാത്രമായിരുന്നു. അബ്കാരി നിയമപ്രകാരം 23 വയസിൽ താഴെ പ്രായമുള്ളവർക്ക് മദ്യം വിൽക്കാൻ പാടില്ല.
നെടുമ്പാശ്ശേരിയിലെ മിനി കൂപ്പർ അപകടം പൊലീസ് വളരെ ഗൗരവത്തോടെയാണ് കാണുന്നതെന്നും ശക്തമായ നടപടി സ്വീകരിക്കുമെന്നും കേരളത്തിൽ ഇനി മുതൽ മദ്യപിച്ച് വാഹനം ഓടിക്കുന്നത് അനുവദിക്കില്ലെന്ന് ആഭ്യന്തര മന്ത്രി രമേശ് ചെന്നിത്തല ഇന്ന് വ്യക്തമാക്കിയിരുന്നു.
“കേസിൽ ഒരാളെയും രക്ഷപ്പെടാൻ അനുവദിക്കില്ല. ഇന്നലെ സംസ്ഥാനത്ത് 12 മണിക്കൂർ നീണ്ട പരിശോധനയിൽ മദ്യപിച്ച് വാഹനം ഓടിച്ച ആയിരത്തോളം പേരെ പൊലീസ് അറസ്റ്റ് ചെയ്തു. യുവാവിൻ്റെ ലൈസൻസ് റദ്ദാക്കുന്നതിന് പുറമെ കർശനമായ നിയമനടപടികളും സ്വീകരിക്കും. 21 വയസിന് താഴെയുള്ളവരെ ബോസ്റ്റൽ സ്കൂളിലേക്ക് അയക്കാൻ തീരുമാനിച്ചത് പൊലീസല്ല. ആ തീരുമാനം കോടതിയുടേതാണ്. ഇത് അറിയാത്ത ചില മാധ്യമപ്രവർത്തകർ തെറ്റിദ്ധാരണ പരത്തുന്നുണ്ട്,” മന്ത്രി രമേശ് ചെന്നിത്തല വ്യക്തമാക്കി.