‘വരനെ ആവശ്യമുണ്ട്’ എന്ന ചിത്രത്തിനുശേഷം അനൂപ് സത്യൻ സംവിധാനംചെയ്യുന്ന ചിത്രത്തിൽ നായകനായി മോഹൻലാൽ. നവംബറിൽ ചിത്രീകരണം തുടങ്ങുന്ന സിനിമ നിർമിക്കുന്നത് ബിനു ജോർജ് അലക്സാണ്ടറും ആശിർവാദ് സിനിമാസും ചേർന്നാണ്. മോഹൻലാൽ തന്നെയാണ് തന്റെ ഫെയ്സ്ബുക്കിലൂടെ പുതിയ ചിത്രം അനൗൺസ് ചെയ്തത്.
ദുൽഖർ സൽമാൻ, സുരേഷ് ഗോപി, ശോഭന, കല്യാണി പ്രിയർദർശൻ എന്നിവരെ അണിനിരത്തി ‘വരനെ ആവശ്യമുണ്ട്’ എന്ന ചിത്രത്തിലൂടെ 2020-ലാണ് അനൂപ് സത്യൻ സംവിധായകനായി അരങ്ങേറിയത്. ഇപ്പോൾ ആറ് വർഷത്തിനുശേഷമാണ് രണ്ടാമത്തെ ചിത്രവുമായെത്തുന്നത്.
ജൂഡ് ആന്റണി ജോസഫുമായി ചേർന്ന് പുതിയ ചിത്രം വരുന്നുണ്ടെന്നും മോഹൻലാൽ കഴിഞ്ഞ ദിവസം അറിയിച്ചിരുന്നു. ജൂഡിന്റെ സംവിധാനത്തിൽ മോഹൻലാലിന്റെ മകൾ വിസ്മയ നായികയായെത്തിയ ‘തുടക്കം’ എന്ന ചിത്രം തിയേറ്ററുകളിൽ മികച്ച പ്രതികരണം നേടിയതിന് പിന്നാലെയാണ് ജൂഡുമായി കൈകോർക്കുന്നതിനേക്കുറിച്ച് മോഹൻലാൽ അറിയിച്ചത്. ‘തുടക്ക’ത്തിൽ മോഹൻലാലും ഒരു പ്രധാനവേഷത്തിലെത്തിയിരുന്നു.
തരുൺ മൂർത്തി ഒരുക്കുന്ന അതിമനോഹരം എന്ന ചിത്രത്തിലാണ് മോഹൻലാൽ ഇപ്പോൾ അഭിനയിക്കുന്നത്. ഇത് ഡിസംബറിൽ തിയേറ്ററുകളിലെത്തുമെന്നാണ് റിപ്പോർട്ടുകൾ. ‘തുടരും’ എന്ന ബ്ലോക്ക്ബസ്റ്റർ ചിത്രത്തിനുശേഷം മോഹൻലാലും തരുണും ഒന്നിക്കുന്ന സിനിമ കൂടിയാണിത്. മീരാ ജാസ്മിനാണ് നായിക. ലൗലജൻ എന്ന പോലീസ് കഥാപാത്രമായാണ് ചിത്രത്തിൽ മോഹൻലാൽ എത്തുന്നത്.