മനാമ: ട്രക്കുകള്‍ക്ക് പൊതുനിരത്തില്‍ കൂടുതല്‍ സമയം നിയന്ത്രണം ആവശ്യമാണെന്ന് എംപിമാര്‍ ആവശ്യപ്പെട്ടു. രാവിലെയും ഉച്ചക്കും അര മണിക്കൂര്‍ കൂടി നിയന്ത്രണം നീട്ടണം എന്നാണ് ആവശ്യം. റോഡിലെ തിരക്ക് മുന്‍നിര്‍ത്തിയാണ് ഈ നിര്‍ദേശം.

നിലവില്‍, രാവിലെ 6:30 മുതല്‍ 8:00 വരെയും ഉച്ചക്ക് 2:00 മുതല്‍ 3:00 വരെയും ലോറികള്‍ക്ക് റോഡുകളില്‍ നിരോധനമുണ്ട്. എന്നാല്‍ തിരക്കേറിയ സമയങ്ങളില്‍ ഈ നിയന്ത്രണം പര്യാപ്തമല്ലെന്നാണ് എംപിമാര്‍ പറയുന്നത്. രാവിലെ 6:30 മുതല്‍ 8:30 വരെയും ഉച്ചകഴിഞ്ഞ് 2:00 മുതല്‍ 3:30 വരെയും നിയന്ത്രണം നീട്ടാന്‍ എംപിമാര്‍ നിര്‍ദേശിച്ചു.

എംപി ലുല്‍വ അല്‍ റൊമൈഹിയാണ് ഈ പദ്ധതി മുന്നോട്ടുവെച്ചത്. ഡോ. മുനീര്‍ സെറൂറും ബദര്‍ അല്‍ തമീമിയും പിന്തുണച്ചു. അതേസമയം, നിര്‍ദേശത്തോട് ആഭ്യന്തര മന്ത്രാലയം വിയോജിച്ചു. നിലവിലുള്ള നിയന്ത്രണം ഫലപ്രദമാണെന്നും അധിക പരിമിതികള്‍ ഡെലിവറികളെ തടസ്സപ്പെടുത്തുകയും വ്യാപാരത്തെ തടസ്സപ്പെടുത്തുകയും ചെയ്യുമെന്ന് മന്ത്രാലയം മുന്നറിയിപ്പ് നല്‍കി.

എന്നിരുന്നാലും, ഈ നിര്‍ദേശം അംഗീകാരിക്കാന്‍ വിദേശകാര്യ, പ്രതിരോധ, ദേശീയ സുരക്ഷ പാര്‍ലമെന്ററി കമ്മിറ്റി ശുപാര്‍ശ ചെയ്തു. എല്ലാ അംഗങ്ങളും പിന്തുണക്കുകയും ചെയ്തു.

The post രാവിലെയും ഉച്ചക്കും ട്രക്കുകള്‍ക്ക് കൂടുതല്‍ നിയന്ത്രണം ഏര്‍പ്പെടുത്തണമെന്ന് എംപിമാര്‍ appeared first on Bahrain Vartha ബഹ്‌റൈൻ വാർത്ത.