கத்தோலிக்க திருச்சபையின் வரலாற்றில் வாக்களிக்கும் வயதுடைய கார்டினல்களின் மிக அதிகமான எண்ணிக்கையாக இது உள்ளது. கார்டினல்கள் கத்தோலிக்க திருச்சபையின் மூத்த குருமார்களாக உள்ளனர். அவர்கள் பொதுவாக ஆயர்களாகவும் நியமிக்கப்படுகிறார்கள்.

போப் பிரான்சிஸ் வாக்களிக்கும் வயதுடைய கார்டினல்களில் பெரும்பான்மையான 108 கார்டினல்களை நியமித்தார். மீதமுள்ளவர்கள் அவரது முன்னோடிகளான பதினாறாவது போப் பெனடிக்ட், இரண்டாவது புனித ஜான் பால் ஆகியோரால் தேர்ந்தெடுக்கப்பட்டனர்.

பொதுவாக, லத்தீன் அமெரிக்காவை சேர்ந்த முதல் போப்பாகவும், 8ஆம் நூற்றாண்டுக்குப் பிறகு ஐரோப்பியர் அல்லாத முதல் போப் ஆண்டவராகவும் இருந்த போப் பிரான்சிஸ், தனது முற்போக்கான மற்றும் பன்மைத்துவம் கொண்ட நடைமுறை தொடர்வதை உறுதி செய்யும் நோக்கில், கார்டினல்களை திட்டமிட்டு நியமித்துள்ளார் என்று சில வாடிகன் நிபுணர்கள் கூறுகின்றனர்.

போப் பிரான்சிஸ் 12 ஆண்டுகள் பதவியில் இருந்தபோது, (பல்வேறு பிராந்தியங்களில் இருந்து கார்டினல்களை நியமித்ததால்), கார்டினல் கல்லூரியின் நிலவியல் பிரதிநிதித்துவம் மாற்றமடைந்தது.

வரலாற்றில் முதன்முறையாக, வாக்களிக்கும் வயதுடைய கார்டினல்களில், ஐரோப்பியர்கள் பெரும்பான்மையாக இல்லை.

தற்போது அவர்கள் 39%ஐ பிரதிநிதித்துவப்படுத்துகின்றனர், இந்த எண்ணிக்கை 2013இல் 52% ஆக இருந்தது.

போப் பிரான்சிஸால் நியமிக்கப்பட்ட வாக்களிக்கும் வயதுடைய 108 கார்டினல்களில், 38% பேர் ஐரோப்பாவை சேர்ந்தவர்கள், 19% பேர் லத்தீன் அமெரிக்கா மற்றும் கரீபியன் பகுதிகளைச் சேர்ந்தவர்கள், 19% பேர் ஆசியா-பசிபிக் பிராந்தியத்தைச் சேர்ந்தவர்கள்.

இவைபோக, 12% துணை-சஹாரா ஆப்பிரிக்காவில் இருந்து, 7% வட அமெரிக்காவில் இருந்து, 4% மத்திய கிழக்கு, வட ஆப்பிரிக்காவில் இருந்து இருக்கின்றனர். ஐரோப்பியர்கள் அல்லாத கார்டினல்களின் எண்ணிக்கை மொத்தம் 73 ஆக உள்ளது.

உலகளவில் அதிக பிரதிநிதித்துவம் கொண்ட கத்தோலிக்க திருச்சபையை நோக்கிய இந்த மாற்றம், 19ஆம் நூற்றாண்டில் தொடங்கிய ஓர் அணுகுமுறையின் வேகமான வளர்ச்சி என்று ஆக்ஸ்போர்ட் பல்கலைக்கழகத்தின் கத்தோலிக்க திருச்சபை வரலாற்று ஆசிரியர் டாக்டர் மைல்ஸ் பட்டெண்டன் கூறுகின்றார்.

இதற்கு முன், கார்டினல்கள் பெரும்பாலும் ஐரோப்பியர்களாகவும், முக்கியமாக இத்தாலியர்களாகவும் இருந்தனர். கத்தோலிக்க சமூகங்கள் எவ்வளவு சிறியதாக இருந்தாலும், அனைத்து கத்தோலிக்க சமூகங்களின் பிரதிநிதிகளாகவும் கார்டினல்களின் கல்லூரி இருக்க வேண்டும் என்று போப் பிரான்சிஸ் நம்பியதாக பட்டெண்டன் கூறுகின்றார்.

“போப் பிரான்சிஸ் திருத்தந்தையாக இருந்தபோது, அயர்லாந்து அல்லது ஆஸ்திரேலியாவைவிட மங்கோலியா, அல்ஜீரியா, இரான் போன்ற நாடுகளில் இருந்து ஏன் அதிகமான கார்டினல்கள் நியமிக்கப்பட்டனர் என்பதை இது விளக்குகிறது,” என்கிறார் பாட்டென்டன்.