பத்திரப்பதிவில் பத்திரப்பதிவில் ஒரு சத–வீத கட்டண சலுகை அளித்து அரசாணை வெளியிடப்பட்டு உள்ளது. இந்த சலுகை நாளை (ஏப்ரல் 1) முதல் அமலுக்கு வரும் என தினத்தந்தி செய்தி வெளியிட்டுள்ளது.

“சமூகத்தில் மட்டுமன்றி அவரவர் குடும்பங்களிலும் மகளிருக்கான சம பங்கை உறுதி செய்–திடும் வகை–யில், வரும் ஏப்ரல் 1 ஆம் தேதி முதல் 10 லட்சம் ரூபாய் வரையிலான மதிப்புள்ள வீடு, மனை, விவசாய நிலம் உள்ளிட்ட அனைத்து அசையா சொத்துகள் பெண்கள் பெயரில் பதிவு செய்யப்பட்டால் பத்திரப்பதிவு கட்டணம் ஒரு சதவீதம் குறைக்கப்படும் என கடந்த பட்ஜெட்டில் அறிவிக்கப்பட்டது.

இந்த திட்டம் நாளை முதல் அமலுக்கு வருகிறது. இதற்கான அரசாணை நேற்று முன்தினம் வெளியிடப்பட்டது. இந்த அரசாணையில், ‘தற்போதைய பதிவுகளில் 75 சதவீதம் மகளிர் இந்த சலுகையை பெற தகுதியை பெறுவார்கள். இந்த சலுகையின் மூலம் பெண்களின் தன்னம்பிக்கை, நிதி சுதந்திரம் மேலும் வலுப்பெறும் என அரசு உறுதியாக நம்புகிறது’ என கூறப்பட்டுள்ளது”, என்று அந்த செய்தியில் தெரிவிக்கப்பட்டுள்ளது.

“தமிழகத்தில் பதிவு கட்டணமாக 2 சதவீதம் வசூலிக்கப்படுகிறது. இதன்படி பார்த்தால் அதிகபட்சம் 10 லட்சத்துக்கு வரையிலான சொத்துக்களை வாங்க 20 ஆயிரம் ரூபாய் பதிவு கட்டணமாக செலுத்த வேண்டும். தற்போதைய புதிய அறிவிப்பின் மூலம் பெண்கள் பெயரில் சொத்துகள் பதிவு செய்யப்பட்டால் பதிவு கட்டணம் 10 ஆயிரம் செலுத்தினால் போதும், இதன்மூலம் 10 ஆயிரம் ரூபாய் மிச்சமாகலாம். 10 லட்சத்துக்கும் அதிகமான மதிப்புள்ள சொத்துகளை பதிவு செய்யும் மகளிர் இந்த சலுகையை பெற முடியாது” என்று ஓய்வுபெற்ற பதிவுத்துறை அதிகாரி ஒருவர் தினத்தந்தியிடம் கூறியதாக அதில் கூறப்பட்டுள்ளது.

“கள்ள சந்தையில் மது விற்பனை செய்த பெண் மாற்றுத் திறனாளிக்கு ஆட்டோ வாங்கி கொடுத்து மணிமங்கலம் காவல் நிலைய காவல்துறையினர் உதவி செய்துள்ளனர் என்று இந்து தமிழ் திசை செய்தி வெளியிட்டுள்ளது.

“காஞ்சிபுரம் மாவட்டம் மணிமங்கலம் காவல் நிலைய எல்லைக்கு உட்பட்ட பகுதியை சேர்ந்த இரு கால்களையும் இழந்த மாற்றுத் திறனாளி பெண் ஸ்டெல்லா மேரி ஆவார். இவரது கணவர் சுரேஷ் வாடகை ஆட்டோ ஓட்டி வருகிறார். சுரேஷுக்கு ஆட்டோ ஓட்டுவதில் போதிய வருமானம் கிடைக்காததால், குடும்ப செலவுகளை சமாளிக்க, ஸ்டெல்லா மேரி கடந்த 2020 ஆம் ஆண்டு முதல் கள்ளத்தனமாக சட்டவிரோதமான முறையில் மதுபாட்டில்களை விற்பனை செய்து வந்தார். அவர் மீது 6 முறை மணிமங்கலம் காவல்துறையினர் வழக்குப் பதிவு செய்துள்ளனர்”, என்று அச்செய்தியில் குறிப்பிடப்பட்டுள்ளது.

“இந்நிலையில் ஸ்டெல்லா மேரியை நேரில் சந்தித்த மணிமங்கலம் காவல் ஆய்வாளர் அசோகன், ‘இது போன்ற சட்டவிரோத செயல்களில் ஈடுபடக் கூடாது’ என வலியுறுத்தியதன் பேரில் கடந்த 3 மாதங்களாக அவர் திருந்து வாழ்ந்து வந்துள்ளார். மேலும் தங்கள் வாழ்வாதாரத்துக்கு வசதி ஏற்படுத்தித் தர வேண்டுமென ஸ்டெல்லா மேரி மணிமங்கலம் காவல்துறையினரிடம் விடுத்த கோரிக்கைக்கு இணங்க அவரது கணவருக்கு 50 ஆயிரம் ரூபாய் முன்பானமாக செலுத்தி புதிய ஆட்டோவை காவல் ஆய்வாளர் அசோகன் வாங்கி கொடுத்துள்ளார்”, என்றும் கூறப்பட்டுள்ளது.

சட்டவிரோத செயலில் ஈடுபடுபவர்களை வழக்குப் பதிவு செய்து சிறையில் அடைத்து வரும் நிலையில் மாற்றுத் திறனாளி பெண்ணின் மறு வாழ்வுக்காக ஆட்டோ வாங்கி தந்த மணிமங்கலம் காவல்துறையினரின் இந்த செயல் நெகிழ்ச்சியை ஏற்படுத்தியுள்ளது என்கிறது இந்து தமிழ் திசையின் அந்த செய்தி.