‘தர்மம் காக்க, அதர்மம் அகற்ற’ என்ற வார்த்தைகள் இடம்பெற்ற காட்சியில், ‘தர்மம்’ என்ற வார்த்தை ஒலிக்கும்போது இந்து முன்னணியின் நிறுவனர் ராமகோபாலனின் படமும் ‘அதர்மம்’ என்ற வார்த்தை ஒலிக்கும்போது பெரியார், அண்ணாதுரை, மு. கருணாநிதி ஆகியோரின் படங்களும் இடம்பெற்றிருந்தன.

அ.தி.மு.கவின் முன்னாள் அமைச்சர்கள் மேடையில் அமர்ந்திருந்த போதே, முன்னாள் முதலமைச்சர் சி.என். அண்ணாதுரை குறித்தும் பெரியார் குறித்தும் விமர்சனத்துடன் கூடிய காட்சிகள் ஒளிபரப்பப்பட்டதும் அதற்கு அ.தி.மு.கவைச் சார்ந்தவர்கள் யாரும் எதிர்ப்புத் தெரிவிக்காததும் பெரும் சர்ச்சையாக உருவெடுத்தது. இது குறித்துப் பேச செல்லூர் ராஜு, ஆர்.பி. உதயகுமார் போன்றவர்களை அணுக மேற்கொள்ளப்பட்ட முயற்சிகள் பலனளிக்கவில்லை.

இந்தக் கூட்டத்தில் பங்கேற்ற பெயரைக் குறிப்பிட விரும்பாத அ.தி.மு.க. தலைவர் ஒருவர், “தோழமைக் கட்சி நடத்தும் மாநாடு என்ற உணர்விலும் சொந்த மாவட்டத்தில் நடக்கும் நிகழ்வு என்ற முறையிலும் இதில் பங்கேற்றோம். நாங்கள் மேடையில் இருந்தோம். அங்கிருந்து பார்த்தபோது, அந்த வீடியோவில் என்ன ஒளிபரப்பானது என்பது அந்தத் தருணத்தில் தெளிவாகத் தெரியவில்லை. தெரிந்திருந்தால் அங்கேயே எதிர்வினையாற்றியிருக்கக் கூடும். இது ஏற்கத்தக்கதல்ல” என்று மட்டும் கூறினார்.

முன்னாள் அமைச்சர் கே.டி. ராஜேந்திரபாலாஜியிடம் செய்தியாளர்கள் கேள்வியெழுப்பிய போது, “அண்ணா போன்ற தலைவர்களை அவ்வாறு கூறியதைத் தவிர்த்திருக்கலாம்” என்று மட்டும் சொன்னார்.

ஆனால், எதிர்க்கட்சியான அ.தி.மு.கவை விமர்சிக்கக் கிடைத்த இந்த வாய்ப்பை தி.மு.க. விடுவதாயில்லை. திங்கட்கிழமை முழுவதும் சேகர் பாபு, ரகுபதி உள்ளிட்ட தி.மு.கவின் அமைச்சர்களும் ஆர்.எஸ். பாரதி போன்ற கட்சியின் முக்கிய பொறுப்பாளர்களும் இந்த விவகாரத்தை முன்வைத்து அ.தி.மு.கவை கடுமையாக விமர்சித்தனர்.

“அண்ணாவைக் கேவலப்படுத்துவதை ‘அண்ணா’ என்ற பெயர் தாங்கிய கட்சி ரசிக்கிறது என்றால், உங்களின் உடம்பில் ஓடுவது அ.தி.மு.க. ரத்தமா? பா.ஜ.க. பாசமா? அண்ணாவின் பெயரைக் காப்பாற்றுவதை விடத் தங்களின் சொத்துகளைக் காப்பாற்றுவதே முக்கியம் என நினைத்துவிட்டார்கள். இன்றைக்கு எம்.ஜி.ஆரும் ஜெயலலிதாவும் இருந்திருந்தால் என்ன நடந்திருக்கும்? அதிமுகவில் சரியான ஆளுமை இல்லாததால், அண்ணாவுக்கும் பெரியாருக்கும் இந்த அவமானத்தைத் தேடித் தந்திருக்கிறார்கள்” எனக் கடுமையாக அறிக்கை மூலம் விமர்சித்தார் ஆர்.எஸ். பாரதி.

இந்த விவகாரம் தொலைக்காட்சிகளில் விவாதப் பொருளாகிக் கொண்டிருந்த அதே நேரத்தில் கோயம்புத்தூர் பேரூர் ஆதினத்தில் நடந்த ஆர்.எஸ்.எஸ். நுாற்றாண்டு விழாவில் அ.தி.மு.கவின் முன்னாள் அமைச்சர் வேலுமணி பங்கேற்றார். இந்த விழாவில் ஆர்.எஸ்.எஸ். தலைவர் மோகன் பகவத், தமிழ்நாடு பாஜக தலைவர் நயினார் நாகேந்திரன் உள்ளிட்டோர் இதில் பங்கேற்றிருந்தனர்.

இது குறித்தும் தி.மு.க. கேள்வியெழுப்பியது. “1956ஆம் ஆண்டு மதுரை மீனாட்சி அம்மன் ஆலயத்தில் நடைபெறாத ஒரு சம்பவத்தைச் சொல்லி அண்ணாவை விமர்சித்தார் தமிழக பா.ஜ.க. தலைவராக இருந்த அண்ணாமலை. அதற்கு எதிர்வினை ஆற்றிய அ.தி.மு.க. இன்றைக்கு எங்கே ஓடி ஒளிந்து கொண்டது? நேற்று முருகன் மாநாட்டில் முன்னாள் அமைச்சர்கள் கலந்து கொண்டால், இன்றைக்குக் கோவையில் ஆர்.எஸ்.எஸ். நூற்றாண்டு விழாவில் அ.தி.மு.க. முன்னாள் அமைச்சர் எஸ்.பி.வேலுமணி பங்கேற்கிறார். அடுத்து நாக்பூரில் எடப்பாடி பழனிசாமி தஞ்சம் அடைவாரா?” எனக் கேட்டிருந்தார் ஆர்.எஸ். பாரதி.

எடப்பாடி கே. பழனிச்சாமி தலைமையிலான அ.தி.மு.கவைப் பொறுத்தவரை, பா.ஜ.கவுடன் கூட்டணி இல்லாத காலகட்டத்தில் பா.ஜ.க., ஆர்.எஸ்.எஸ். தொடர்பான நிகழ்ச்சிகளில் பங்கேற்றவர்கள் மீது நடவடிக்கை எடுக்கப்பட்டிருக்கிறது. உதாரணமாக, 2024ஆம் ஆண்டு அக்டோபர் மாதம் ஆறாம் தேதி, கன்னியாகுமரியில் ஆர்.எஸ்.எஸ் பேரணியை முன்னாள் அமைச்சர் தளவாய் சுந்தரம் துவக்கிவைத்தார். அடுத்த இரு நாட்களில் அவர் வகித்துவந்த அ.தி.மு.கவின் அமைப்புச் செயலாளர் பதவியிலிருந்தும் கன்னியாகுமரி கிழக்கு மாவட்டச் செயலாளர் பதவியிலிருந்தும் தற்காலிகமாக நீக்கப்பட்டார். பிறகு நவம்பர் மாதத்தில், இந்த நிகழ்வு தொடர்பாக வருத்தம் தெரிவித்ததால், மீண்டும் அவருக்கு அதே பொறுப்புகள் வழங்கப்படுவதாக அறிவித்தார் எடப்பாடி கே. பழனிசாமி.

2025ஆம் ஆண்டு மார்ச் மாதம் பா.ஜ.க. மும்மொழிக் கொள்கைக்கு ஆதரவாக ஒரு கையெழுத்து இயக்கத்தை நடத்தியது. திருவள்ளூர் மாவட்டத்தைச் சேர்ந்த முன்னாள் அ.தி.மு.க. சட்டமன்ற உறுப்பினரான விஜயகுமார் அதில் பங்கேற்று, கையெழுத்திட்டார். இதையடுத்து, அவர் கட்சியிலிருந்து நீக்கப்படுவதாக அறிவித்தார் எடப்பாடி கே. பழனிசாமி.