அமித் ஷா தமிழ்நாட்டில் கூட்டணி ஆட்சி என்ற முழக்கத்தை முன்வைத்திருப்பது விவாதப் பொருளாக மாறியுள்ளது. “2014ஆம் ஆண்டு முதல் பா.ஜ.க செயல்படுத்தி வரும் மாடல் இது” எனக் கூறுகிறார் பத்திரிகையாளர் கோலாகல ஸ்ரீனிவாஸ்.

“தேர்தல் முடிவில் பெரும்பான்மை இடங்களைப் பிடித்தாலும் களத்தில் தங்களுடன் பணியாற்றிய கட்சிகளுக்கு ஆட்சியில் பங்கு கொடுப்பது என்ற முடிவை 2014ஆம் ஆண்டு பிரதமர் மோதி செயல்படுத்தினார்” என அவர் குறிப்பிட்டார்.

பிபிசி தமிழிடம் பேசிய அவர், “இது ஓர் ஆரோக்கியமான மாடல். இதைப் பேச்சுவார்த்தையின் போது எடப்பாடி பழனிசாமிக்கு பா.ஜ.க தலைமை புரிய வைத்திருக்கலாம். அதனால்தான் அவர் தலைமையில் கூட்டணி ஆட்சி என அமித் ஷா கூறினார்” என்கிறார்.

கடந்த ஆண்டு ஜூன் மாதம், ஆந்திர சட்டப்பேரவைத் தேர்தலில் தெலுங்குதேசம் கட்சி பெரும்பான்மை இடங்களைப் பிடித்து வெற்றி பெற்றது. ஆனாலும், கூட்டணியில் இடம்பெற்றிருந்த ஜனசேனா கட்சியின் பவன் கல்யாணுக்கு துணை முதலமைச்சர் பதவியை சந்திரபாபு நாயுடு கொடுத்ததை அவர் குறிப்பிட்டார்.

இந்தக் கருத்தை மறுத்துப் பேசும் பத்திரிகையாளர் கா.அய்யநாதன், “பா.ஜ.க-வின் அழுத்தத்துக்கு எடப்பாடி பழனிசாமி வளைந்து கொடுத்துவிட்டார். மகாராஷ்டிராவை போல ஆட்சியில் பங்கு எனக் கூறிவிட்டு பிறகு மாநிலக் கட்சிகளைப் பின்னுக்குத் தள்ளுவதுதான் பா.ஜ.க-வின் இலக்காக உள்ளது” எனக் கூறினார்.

தி.மு.க அமைப்புச் செயலாளர் ஆர்.எஸ்.பாரதியும் இதே கருத்தை பிபிசி தமிழிடம் தெரிவித்தார். “மகாராஷ்டிரா அரசியல் ஃபார்முலாவை தமிழ்நாடு அரசியலிலும் பின்பற்றுவதற்கு பா.ஜ.க முயல்கிறது. அதற்கு தமிழ்நாடு மக்கள் இடம் கொடுக்க மாட்டார்கள்” என்றார்.

எடப்பாடி பழனிசாமி தலைமையில் தேர்தலைச் சந்திக்க உள்ளதாக அமித் ஷா கூறியதை சுட்டிக்காட்டிய கா.அய்யநாதன், “கூட்டணி ஆட்சி என்பதை எடப்பாடி பழனிசாமிதான் அறிவித்திருக்க வேண்டும். எடப்பாடி பழனிசாமியை அருகில் வைத்துக் கொண்டு அமித் ஷா அறிவித்துள்ளார். இதற்கு பா.ஜ.க கொடுத்த அழுத்தம்தான் காரணம்” எனக் குறிப்பிட்டார்.

ஆனால், “கூட்டணியில் சேர்வதற்கு எந்த நிபந்தனையும் விதிக்கப்படவில்லை. இது இயல்பான கூட்டணி” என செய்தியாளர் சந்திப்பின் போது அமித் ஷா தெரிவித்திருந்தார்.

அதேநேரம், விடுதலைச் சிறுத்தைகள், புதிய தமிழகம் உள்படப் பல்வேறு கட்சிகள் கூட்டணி ஆட்சி என்பதை முன்னிறுத்திப் பேசி வருவதைக் குறிப்பிட்டுப் பேசும் கோலாகல ஸ்ரீனிவாஸ், “இது தேர்தல் நெருக்கத்தில் தி.மு.க-வுக்கு நிர்பந்தத்தை ஏற்படுத்தலாம்” எனக் கூறுகிறார்.

“சட்டப்பேரவைத் தேர்தல் வரும்போது சிறிய கட்சிகளும் ஆட்சியில் பங்கு கேட்பதற்கான சூழல் உருவாகும். அவர்களுக்கு அதிகாரம் கிடைக்கும்போது அவர்கள் சார்ந்த சமூகங்களுக்கும் பலன் கிடைக்கும்” எனவும் அவர் தெரிவித்தார்.

ஆனால், தி.மு.க அமைப்புச் செயலாளர் ஆர்.எஸ்.பாரதியோ, “அதற்கு வாய்ப்பு இல்லை. பிற மாநிலங்களைப் போல தமிழ்நாட்டு மக்கள் சிந்திக்க மாட்டார்கள். அவ்வாறான முடிவை அவர்கள் ஒருபோதும் எடுக்க மாட்டார்கள்” எனக் குறிப்பிட்டார்.

தொடர்ந்து பேசிய ஆர்.எஸ்.பாரதி, “கூட்டணி ஆட்சி என்பது தமிழ்நாட்டு மக்கள் எந்தக் காலத்திலும் ஏற்றுக் கொள்ளாத ஒன்று. எங்களுக்கு அதில் முன் அனுபவம் உள்ளது” எனக் கூறி, 1980ஆம் ஆண்டு சட்டப்பேரவை தேர்தலைக் குறிப்பிட்டார்.

“அந்தத் தேர்தலில் தி.மு.க-வும் இ.காங்கிரஸும் (இந்திரா காந்தி தலைமையிலான காங்கிரஸ்) சரிபாதியாகத் தொகுதிகளைப் பிரித்துக் கொண்டு போட்டியிட்டன. அந்த தேர்தலில் வென்றால் கூட்டணி ஆட்சிதான் அமையும் என்ற சூழல் இருந்தது. தி.மு.க-வுக்கு அனைத்து வெற்றி வாய்ப்புகளும் இருந்தும் தோல்வியே கிடைத்தது” எனவும் அவர் தெரிவித்தார்.

கடந்த 1980ஆம் ஆண்டு சட்டப்பேரவைத் தேர்தலில் இ.காங்கிரஸ் கட்சியுடன் தி.மு.க கூட்டணி வைத்தது. கூட்டணியில் இருந்த சிறிய கட்சிகளுக்கு ஒதுக்கியது போக, எஞ்சியிருந்த தொகுதிகளில் திமுகவும், காங்கிரஸும் சரிபாதி இடங்களில் போட்டியிட்டன. இந்த கூட்டணி வென்றால் ‘யார் முதலமைச்சர்?’ என்ற கேள்வி எழுந்தபோது, ஒரு கட்டத்தில், ‘கருணாநிதியே முதலமைச்சர்’ என இந்திரா காந்தி அறிவித்தார்.

ஆனால், தேர்தல் முடிவில் தி.மு.க கூட்டணிக்கு 96 இடங்களே கிடைத்தன. தி.மு.க 38 இடங்களிலும் இ.காங்கிரஸ் கட்சி 31 இடங்களிலும் வெற்றி பெற்றது.

“கூட்டணி ஆட்சி என்ற ஒன்றை மக்கள் ஏற்றுக் கொள்ளவில்லை என்பதற்கு இந்தத் தேர்தல் முடிவுகளே உதாரணம்” என்று ஆர்.எஸ். பாரதி குறிப்பிட்டார்.

சென்னையில் இருந்து கன்னியாகுமரி வரை ஒரே மாதிரியான வாக்குகளை தி.மு.க கூட்டணி பெறும் என்றும் முதலமைச்சர் ஸ்டாலின் கூறுவதைப் போல 200 தொகுதிகளுக்கு மேல் வெற்றி பெறுவோம் எனவும் ஆர்.எஸ்.பாரதி தெரிவித்தார்.