சி.ஏ.ஏ சட்டத்திற்கு ஆதரவாக வாக்களித்திருந்த அதிமுக, வக்பு வாரிய சட்ட திருத்தம், மும்மொழிக் கொள்கை, நீட் தேர்வு ஆகிய அம்சங்களில் பாஜகவுடன் முரண்பட்டது. முன்னாள் முதல்வர் ஜெயலலிதா தொடர்பாக அண்ணாமலை முன்வைத்த கருத்துக்கள், பெரியார், அண்ணா மீதான விமர்சனங்கள் அவ்வப்போது அதிமுகவுக்கு நெருடலை கொடுத்துள்ளது. இதனால் பாஜகவுடனான கூட்டணியை தொகுதி உடன்பாடு என்ற நிலையில் நிறுத்திக் கொள்ளவே அதிமுகவினர் விரும்புகிறார்கள். ஆனால், பாஜகவின் பிடி இறுக்கமாக இருப்பதால் அதிமுகவால் அதை உரக்கச் சொல்ல முடியவில்லை என்று விமர்சனங்கள் தொடர்கின்றன.

இந்த விமர்சனங்கள் குறித்து கேட்ட போது, ” காங்கிரஸ் -திமுக இடையே கருத்து வேறுபாடுகள் இல்லையா? மேகதாது விவகாரத்தில் இரு கட்சிகளும் ஒரே நிலைப்பாடு கொண்டுள்ளனவா? காங்கிரஸ் ஆளும் மாநிலங்களில் நீட் தேர்வு வேண்டாம் என்று தீர்மானம் நிறைவேற்றுவார்களா? நாங்கள் திமுக ஆட்சிக்கு முடிவு கட்டவே இந்த கூட்டணியை அமைத்துள்ளோம்” என்று கூறுகிறார் அதிமுகவின் தேசிய செய்தித் தொடர்பாளர் கோவை சத்யன்.

” இரண்டு முறை தொடர்ந்து ஆட்சியில் இருந்த பிறகு மூன்றாவது முறை ஆட்சியை குறைந்த வாக்குகள் வித்தியாசத்திலேயே இழந்தோம். இந்த முறை அப்படி எதுவும் நேர்ந்துவிடக் கூடாது என்று தான் கூட்டணி அமைத்துள்ளோம். 2019-ம் ஆண்டு நாடாளுமன்றத் தேர்தலை விட, 2024-ம் ஆண்டு தேர்தலில் எங்கள் வாக்கு சதவீதம் அதிகரித்திருந்தது. களத்தில் அதிமுகவும் பாஜகவும் கைகோர்த்து நிற்கின்றன” என்கிறார் அவர்.

‘அதிமுக-பாஜக கூட்டணி வலுவடைந்து வருவதை திமுகவால் சகித்துக் கொள்ள முடியவில்லை. அதிமுகவுக்கு எந்த தர்ம சங்கடமான நிலையும் ஏற்படவில்லை.’ என்று கூறிய பாஜக மாநில பொதுச் செயலாளர் நாராயணன் திருப்பதி “சொந்த சின்னத்தில் போட்டியிட முடியாத விசிக, மிகக் குறைந்த தொகுதிகளை ஏற்றுக் கொண்ட கம்யூனிஸ்டுகள் மற்றும் காங்கிரஸ் தான், அதிமுக பாஜகவிடம் சிக்கியிருப்பதாக பேசுகிறார்கள்.” என்று பதிலடி தருகிறார்.

அதிமுக – பாஜக கூட்டணியில் பாஜகவின் கை ஓங்கியுள்ளதா என்று கேட்டதற்கு பதிலளித்த கோவை சத்யன், “அதிமுக-பாஜக கூட்டணி வேண்டும் என்று யார் கேட்டது? பாஜக தானே. கடந்த முறை கூட்டணியில் அதிருப்தி ஏற்பட்ட போது என்ன நடந்தது? நாங்கள் வெளியேற தயங்க மாட்டோம் என்று அவர்களுக்கு தெரியும்” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு