இந்தச் சம்பவம் தொடர்பான தேடுதல் மற்றும் மீட்பு முயற்சிகளின் போது அமெரிக்கக் குழுவினர் துப்பாக்கிச் சூட்டை எதிர்கொண்டதாகவும் தெரிவிக்கப்பட்டுள்ளது.

அமெரிக்காவின் ஏ-10 (A10) விமானத்தை தாங்கள் சுட்டு வீழ்த்தியதாக இரானிய ராணுவம் கூறியுள்ளதாக அந்நாட்டு அரசு ஊடகங்கள் தெரிவிக்கின்றன.

“அமெரிக்க ஏ-10 விமானம் ஒன்று ராணுவ வான் பாதுகாப்புப் படையின் பாதுகாப்பு அமைப்புகளால் சுடப்பட்டது மற்றும் அது தெற்கு இரானில் உள்ள பாரசீக வளைகுடாவில் விழுந்து நொறுங்கியது” என்று இரானிய ராணுவத்தை மேற்கோள் காட்டி இரானின் அரசு தொலைக்காட்சி செய்தி வெளியிட்டுள்ளது.

அந்த விமானம் சில மணிநேரங்களுக்கு முன்பு ஹோர்மூஸ் நீரிணை பகுதியில் சுட்டு வீழ்த்தப்பட்டதாகவும் அச்செய்தி தெரிவிக்கிறது.

இது, எஃப்-15இ (F-15E) விமானத்திற்கான தேடுதல் மற்றும் மீட்பு முயற்சியின் போது தாக்கப்பட்டதாக பிபிசியின் அமெரிக்க கூட்டு செய்தி முகமையான சிபிஎஸ் தெரிவித்த அதே ஏ-10 வார்தாக் (A-10 Warthog) விமானமா என்பது தெளிவாகத் தெரியவில்லை.

இரான் வான்வெளியில் அமெரிக்கப் போர் விமானம் சுட்டு வீழ்த்தப்பட்டதாக செய்திகள் வெளியான பிறகு, இரானிய நாடாளுமன்ற சபாநாயகர் முகமது பாகர் காலிபாஃப், தனது எக்ஸ் பக்கத்தில் அமெரிக்காவைக் கேலி செய்து பதிவிட்டுள்ளார்.

“அவர்கள் தொடங்கிய இந்த அற்புதமான வியூகமற்ற போர் இப்போது ‘ஆட்சி மாற்றம்’ என்பதிலிருந்து ‘தயவுசெய்து, எங்கள் விமானிகளை யாராவது கண்டுபிடிக்க முடியுமா?’ என்ற நிலைக்கு தள்ளப்பட்டுள்ளது” என்று காலிபாஃப்பின் எக்ஸ் கணக்கில் உள்ள ஒரு பதிவு தெரிவிக்கிறது.

இரானில் ஆட்சி மாற்றம் ஏற்பட்டுள்ளதாக மார்ச் 31 அன்று அமெரிக்க அதிபர் டிரம்ப் கூறினார், புதிய இரானியத் தலைவர்கள் அதிகம் பகுத்தறிவுள்ளவர்கள் என்றும் அவர் கூறினார்.

காலிபாஃப், “வாவ், என்ன ஒரு நம்பமுடியாத முன்னேற்றம். அசல் மேதைகள்,” என்றும் கிண்டலாக பதிவிட்டுள்ளார்.

அவரது எக்ஸ் கணக்கில் சமீபகாலமாக தொடர்ந்து பதிவுகள் வெளியாகின்றன, அவ்வப்போது மீம்ஸ் பதிவிடப்படுகின்றன. அதே சமயம், காலிபாஃப் கடைசியாக மார்ச் 17 அன்று அரசு தொலைக்காட்சியில் காணப்பட்டார்.

டிரம்ப் நிர்வாகம் காலிபாஃப்பை ஒரு சாத்தியமான கூட்டாளியாகவும், எதிர்காலத் தலைவராகவும் கூட பரிசீலித்து வருவதாக சில உறுதிப்படுத்தப்படாத செய்திகள் தெரிவிக்கின்றன.

அமெரிக்கா, தனது போர் விமானங்கள் மற்றும் ஹெலிகாப்டர்களைப் பயன்படுத்தி மிகப்பெரிய அளவிலான முயற்சிகளை மேற்கொண்ட போதிலும், சுட்டு வீழ்த்தப்பட்ட எஃப்-15 போர் விமானத்தின் ‘காணாமல் போன விமானியை’ தேடும் பணிகள் இன்னும் முழு வீச்சில் தொடர்வதாக இரானின் தெற்கு கோகிலுயே-போயரஹ்மத் மாகாணத்தின் துணை ஆளுநர் தெரிவித்துள்ளார்.

இரானின் அரசு ஆதரவு செய்தி முகமையான ஃபார்ஸ் (Fars) செய்தியின்படி, “காணாமல் போன நபரை கண்டுபிடிப்பதற்கான, காவல்துறை, பாதுகாப்புப் படைகள் மற்றும் உள்ளூர் மக்களின் முயற்சிகள் இன்னும் தொடர்ந்து வருகின்றன” என்று மாகாண துணை ஆளுநர் கூறியதுடன், ‘காணாமல் போன விமானி’ பற்றி ஏதேனும் தகவல் கிடைத்தால் அதிகாரிகளைத் தொடர்பு கொள்ளுமாறு அப்பகுதி மக்களைக் கேட்டுக் கொண்டுள்ளார்.

விமானம் சரியாக எங்கே சுட்டு வீழ்த்தப்பட்டது என்பது தெரியவில்லை என்றாலும், இரானின் அரசு ஊடகங்களில் இதுவரை இரண்டு மாகாணங்களின் பெயர்கள் அடிக்கடி குறிப்பிடப்படுகின்றன – அவை கோகிலுயே-போயரஹ்மத் மற்றும் குசெஸ்தான்.

– இது, பிபிசிக்காக கலெக்டிவ் நியூஸ்ரூம் வெளியீடு