“சீர்காழியில் கடந்த 24-ந் தேதி அங்கன்வாடிக்கு சென்ற அக்குழந்தை 16 வயது சிறார் குற்றவாளியால் பாலியல் வன்கொடுமை செய்யப்பட்டு, தலை மற்றும் கண் சிதைக்கப்பட்ட சம்பவத்தில் அந்த குழந்தையே தவறாக நடந்து கொண்டிருக்கிறது.

எனக்கு கிடைத்த தகவலின்படி அந்த குழந்தை, சிறுவனின் முகத்தில் எச்சில் துப்பியுள்ளது. அதுதான் காரணம். எனவே இரண்டு தரப்பையும் பார்க்க வேண்டிய கட்டாயத்தில் நாம் இருக்கிறோம் என்று அவர் தெரிவித்தார்.

ஆட்சியரின் இந்த சர்ச்சை பேச்சுக்கு பல்வேறு தரப்பில் இருந்தும் கடும் எதிர்ப்புகள் கிளம்பின. இந்த சூழ்நிலையில் ஆட்சியர் மகாபாரதியை உடனடியாக இடமாற்றம் செய்து தமிழக அரசு நேற்று உத்தரவிட்டுள்ளது.

அவருக்கு எந்த பணியும் அறிவிக்கப்படவில்லை. அவருக்கு பதிலாக ஈரோடு மாநகராட்சி ஆணையர் ஸ்ரீகாந்த், மயிலாடுதுறை ஆட்சியராக நியமிக்கப்பட்டுள்ளார்,” என்று அந்த செய்தியில் குறிப்பிடப்பட்டுள்ளது.

நடிகை ஒருவர் அளித்த பாலியல் துன்புறுத்தல் புகாரில் நாம் தமிழர் கட்சியின் தலைமை ஒருங்கிணைப்பாளர் சீமானிடம் சென்னை வளசரவாக்கம் காவல்துறையினர் விசாரணை நடத்தியதாக இந்து தமிழ் திசை நாளிதழ் செய்தி வெளியிட்டுள்ளது.

நடிகை ஒருவரை திருமணம் செய்து கொள்வதாகக் கூறி அவரை ஏமாற்றியதாக 2011-ஆம் ஆண்டு தொடரப்பட்ட வழக்கை ரத்து செய்ய வேண்டும் என்று உயர் நீதிமன்றத்தை சீமான் நாடிய நிலையில், கடந்த மாதம் சீமானின் கோரிக்கையை ரத்து செய்தது.

அவர் மீது வைக்கப்பட்ட குற்றச்சாட்டுகளின் தீவிரத்தன்மையை கருத்தில் கொண்டு 12 வாரங்களுக்குள் விசாரணையை நடத்தி அறிக்கையை தாக்கல் செய்ய வேண்டும் என்று உயர் நீதிமன்றம் அறிவித்திருந்தது.

இந்த சூழலில் நேற்று இரவு 10 மணிக்கு வளசரவாக்கம் காவல் நிலையத்தில் ஆஜரான சீமானை காவல் துறை இணை ஆணையர் அதிவீர பாண்டியன், உதவி ஆணையர் செம்பேடு பாபு மற்றும் வளசரவாக்கம் காவல் நிலைய சட்டம் ஒழுங்கு ஆய்வாளர் விசாரித்தனர்.

இந்த வழக்கு தொடர்பாக சுமார் 50-க்கும் மேற்பட்ட கேள்விகள் காவல்துறை தரப்பில் கேட்கப்பட்டதாக தகவல் வெளியாகி உள்ளது. அதற்கு சீமான் அளித்த பதில் அனைத்தும் எழுத்துப்பூர்வமாகவும், வீடியோவாகவும் பதிவு செய்யப்பட்டது.

சீமானின் வருகையை முன்னிட்டு 300-க்கும் மேற்பட்ட போலீசார் குவிக்கப்பட்டனர். தீயணைப்பு வாகனம், 108 ஆம்புலன்ஸ் தயார் நிலையில் வைக்கப்பட்டிருந்தது. நாம் தமிழர் கட்சித் தொண்டர்கள் அத்துமீறினால் கைது செய்து அழைத்து செல்ல பேருந்துகளையும் காவல்துறையினர் தயார் நிலையில் வைத்திருந்தனர் என்று அந்த செய்தியில் குறிப்பிடப்பட்டிருந்தது.