சியோமா – இக்கே தம்பதி கூறுவதுப் போல, ஹோப் அவர்களின் உண்மையான குழந்தை என்று அந்த அறையில் இருக்கும் இக்கே குடும்பத்தைச் சேர்ந்த ஐந்து பேரும் நம்பவில்லை.

சியோமா இந்த குழந்தையை கிட்டதட்ட 15 மாதங்கள் சுமந்ததாக கூறுகிறார். அந்த ஆணையர் மற்றும் இக்கேவின் குடும்பத்தினர் இந்த கூற்றை நம்ப மறுக்கின்றனர்.

“குழந்தைப் பெற்றுக்கொள்ள வேண்டும் என்ற அழுத்தத்தை இக்கேவின் குடும்பத்திடமிருந்து சந்தித்தேன். மற்றொரு பெண்ணை திருமணம் செய்து கொள்ளுமாறு இக்கேவை அவர்கள் கேட்டனர்,” என சியோமா கூறுகிறார்.

விரக்தியில், வழக்கத்திற்கு மாறான ‘சிகிச்சையை’ வழங்கும் ‘மருத்துவமனைக்கு’ சென்றார் சியோமா. தாய்மை அடைய வேண்டும் என தீவிரமாகவுள்ள பெண்களைக் குறிவைத்து நடத்தப்படும் ஒரு விசித்திரமான மற்றும் குழப்பமான மோசடியில் ஈடுபடும் மருத்துவமனை அது. குழந்தைகளை கடத்தும் பணிகளிலும் அவர்கள் ஈடுபட்டிருந்தனர்.

‘ரகசிய கர்ப்ப மோசடி’ (cryptic pregnancy scam) தொடர்பான எங்கள் செய்தி சேகரிப்பின் ஒரு பகுதியாக சியோமாவுடன் ஆணையர் நடத்திய கலந்துரையாடலில் பங்கேற்க பிபிசி அதிகாரிகள் அனுமதிக்கப்பட்டனர்.

சியோமா, இக்கே மற்றும் இந்த கட்டுரையில் பயன்படுத்தப்பட்டுள்ள பிற பெயர்கள் அனைத்துமே மாற்றப்பட்டுள்ளன.

உலகில் அதிக பிறப்பு விகிதம் கொண்டுள்ள நாடுகளில் நைஜீரியாவும் ஒன்று. இதில் பெரும்பாலும் பெண்கள் கருத்தரிக்க வேண்டும் என்ற சமூக அழுத்தங்களை எதிர்கொள்கின்றனர். கருத்தரிக்காத பட்சத்தில் அவர்கள் ஒதுக்கிவைக்கப்படுகிறார்கள் அல்லது சித்திரவதைக்கு உள்ளாகிறார்கள்.

இந்த அழுத்தத்தால், சில பெண்கள் தாய்மைப் பற்றிய தங்களின் கனவை நனவாக்க எந்த எல்லைக்கும் செல்கின்றனர்.

ஒரு வருடத்திற்கும் மேலாக, பிபிசி ஆப்ரிக்கா ஐ (BBC Africa eye) ‘ரகசிய கர்ப்ப’ மோசடி பற்றி புலனாய்வு மேற்கொண்டது.

மருத்துவர்கள் அல்லது செவிலியர்களாக தங்களை இந்த மோசடிக்காரர்கள் காட்டிக்கொண்டு, கர்ப்பம் தரிக்க “அதிசய கருவுறுதல் சிகிச்சை” இருப்பதாக பலரை நம்ப வைக்கின்றனர்.

ஆரம்பக்கட்ட “சிகிச்சைக்கு” பொதுவாக நூற்றுக்கணக்கான டாலர் செலவாகும். அந்த சிகிச்சையில் பெண்களுக்கு ஒரு ஊசி, ஒரு பானம் அல்லது பெண்ணின் பிறப்புறுப்பில் ஒரு பொருளை வைத்தல் போன்றவை இடம் பெறும்.

எங்கள் விசாரணையில் நாங்கள் பேசிய பெண்கள், அதிகாரிகள் என எவருக்கும் இந்த மருந்துகளில் என்ன இருந்து என்பது தெரியவில்லை. ஆனால் சில பெண்கள் எங்களிடம் கூறுகையில், இந்த சிகிச்சைக்குப் பிறகு, வயிறு வீங்குதல் போன்று, அவர்கள் உடலில் மாற்றங்கள் ஏற்பட்ட வழிவகுத்தது என்கின்றனர். இது அவர்களை கர்ப்பமாக இருப்பதாக நம்பவைத்துள்ளது.

இந்த சிகிச்சையைப் பெற்ற பெண்கள் வழக்கமான மருத்துவர்கள் மற்றும் மருத்துவமனைகளை அணுக வேண்டாம் என எச்சரிக்கப்படுகின்றனர். ஏனெனில் எந்த ஸ்கேன் அல்லது கர்ப்ப கால சோதனையிலும் “குழந்தை” கண்டறியப்படாது, இது கருப்பைக்கு வெளியே வளரும் குழந்தை என மோசடிக்காரர்கள் கூறியிருக்கின்றனர்.

“பிரசவம்” செய்ய வேண்டிய நேரம் வரும் போது, பெண்களுக்கு “அரிதான, விலையுயர்ந்த மருந்து” கொடுத்தால் தான் பிரசவ வலி வரும் என்று மோசடிக்காரர்கள் கூறுகின்றனர். அதற்கு மேலும் பணம் கொடுக்க வேண்டும்.

பிரசவம் எவ்வாறு பார்க்கப்படுகிறது என்பது ஒவ்வொருவருக்கும் வெவ்வேறாக உள்ளது. அவை குழப்பமானவையாகவும் உள்ளன. சிலருக்கு மயக்க மருந்து தரப்படுகிறது. அறுவை சிகிச்சை செய்யப்பட்ட அறிகுறிகளுடன் அவர்கள் கண் விழிக்கின்றனர். மற்றவர்கள் ஊசி கொடுத்த பிறகு தூக்கம், சுயநினைவற்ற நிலையை அவர்கள் அடைந்ததாகவும், அதற்கு பிறகு அவர்களுக்கு குழந்தை பிறந்துள்ளது என்று நம்புவதாகவும் அவர்கள் கூறுகின்றனர்.

ஏதாவது ஒரு வகையில் அந்த பெண்கள் கையில் குழந்தையுடன் வீடு திரும்புகின்றனர்.

“பிரசவத்திற்கான நேரம் வந்த போது மருத்துவர் என்று அழைக்கப்பட்ட நபர், எனது இடுப்பில் ஊசி போட்டார். பிறகு, குழந்தையை அழுத்தி வெளியே தள்ளுமாறு கூறினார்” என்று ஆணையர் இஃபி ஒபினாபோவிடம் சியோமா கூறினார். ஆனால் அவருக்கு ஹோப் எப்படி பிறந்தார் என்பது தெரியவில்லை. ஆனால் பிரசவம் “வலியுடன்” இருந்ததாக கூறுகிறார்.